Gasteiz argiztatu dute Aitor Zelaia eta Galder Barbadoren aurkako epaiketa salatzeko
Hiriburuko hainbat puntutatik jaurtitako su artifizialek argitu dute hiria urtarrilaren 20ko goizaldean, bi gazte arabarren aurkako epaiketaren atarian. Ostegunean hasiko da Barbado eta Zelaiaren aurkako epaiketa; fiskaltzak 16 urteko espetxe zigorra eskatu du.
Gasteizko Alde Zaharrean edota Judimendin bizi bazara eta su artifizialezberdinek esnatu bazaituzte… Ez, ez da San Sebastian eguna ospatzeko su artifizialen festa bat izan.
Hala Bedik jasotako bideo batean ikus daitezkeenez, hiriko hainbat txoko argiztaturik esnatu da Gasteiz. Ekintzaileek etxe honi bidalitako ohar batean adierazi dutenez, urtarrilaren 21 eta 22an Audientzia Nazionalean epaituak izango diren Galder Barbado eta Aitor Zelaia gazte arabarren aurkako auziaren salaketa Gasteiz osora zabaldu nahi izan dute modu honetan.
Goizeko 07.00ak aldera (Alde Zaharra, Judimendi, Unibertsitateak…) su artifizialak piztu dituzte Arabako hiriburuan, epaiketa bera “ankerkeria” dela salatzeko mezua zabaldu asmoz. Eskaera fiskal handiei egin beharko diete aurre Aitor Zelaia gasteiztarrak eta Galder Barbado amurrioarrak, Duranan aurkitutako kohete batzuen harira Ertzaintzak bi gazte arabarrak atxilotu zituenetik bi urte bete direnean.
Epaiketa egunetan zehar ekimenak
Hamarnaka elkartasun ekintza egin dira Araban zehar azken egunotan, ate joka dagoen epaiketa salatzeko eta auzipetuei babesa adierazteko. Urtarrilaren 21 eta 22an ere, epaiketa igaroko den egunetan, Amurrio eta Gasteizen elkarretaratzeak, eta egun osoko informazio gunea eta manifestazioa iragarri dituzte, hurrenez hurren, ANkerkeria STOP herri egitasmoak deiturik.
Gasteizko kasuan, manifestzioa ostegun honetan izango da, 19:00etan Andra Maria zuriaren plazatik abiatuta. Amurrion, berriz, ostiralean bilduko dira.
🚨ADI🚨
Galder Barbado eta Aitor Zelaiaren aurkako epaiketa bihar bertan hasiko da. Epaiketaren egunetan, mobilizazioak Gasteizen eta Amurrion:
▪️Gasteiz. Osteguna 21. 19:00 Andra Mari Zuriaren plaza.
▪️Amurrio. Ostirala 22. 18:00 Herriko plaza.#ANkerkeriariSTOP pic.twitter.com/ACFJPI9kKo— ANkerkeriariStop (@ANkerkeriaSTOP) January 20, 2021
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
