Bihar amaituko da Gasteizen Ibilian Ibilian Arabako itzulia
Arabako Sare Herritarrak antolatuta, presoen eskubideak aldarrikatzeko lurralde osoa zeharkatuko duen martxa egin dute Araban zehar. Atzo, urriaren 7an, hasi ziren Agurainen eta bihar amaituko da Gasteizen, ekitaldi batekin.
Lurralde osoa zeharkatu dute arabarrek asteburu honetan, urriaren 7tik 9ra bitartean, euskal preso politikoei elkartasuna adierazi eta haien eskubideak aldarrikatzeko, SAREk antolatutako ibilaldian. Helburua bi aldarri nagusi zabaltzea da: euskal preso guztien euskalherriratzea eta graduen progresioa. Izan ere, SAREren arabera, «etapa berri bati hasiera ematen ari gara; urruntze politika atzean utzi eta euskal preso eta iheslarien etxerako bidea egiteko etapari», eta hori hauspotu asmoz egin dute martxa.
Bihar, urriak 9, amaituko da martxa Gasteizen. Ibilaldiaren azken etapa egingo dute 11.3oetan Bilbo plazatik hasita, eta Foru enparantzan amaituko da 12:00etan. Amaiera ekitaldia egingo dute.
Ibilbide osoa kontsultatu daiteke hemen.
Euskal presoen etxeratzea
Sare Herritarraren arabera euskal preso politikoei, legez, «Euskal Herritarrak diren heinean, zigorra hemengo espetxeetan betetzea» dagokie, eta «gainontzeko presoei ezartzen zaien legedi arrunta jarraituz, 3/4ak beteak izatean, baimenak eta baldintzapeko askatasuna eskuratzeko aukera» izan beharko lukete. Horixe da mugimendu honek datozen hilabeteetan hauspotuko duen bidea, «euskal presoak etxeratzeko jarraitu beharreko» bidea dela defendatzen baitute.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
