[Argazki Galeria] Euskal hezkuntza publikoaren greba: irakasleek kanpaldia eta manifestazioa egin dituzte Gasteizen
LAB, Steilas, ELA eta CCOO sindikatuek deitutako greba-egunen baitan, Euskal Hezkuntza Publikoko irakasleek protestak areagotu dituzte Gasteizen.
![[Argazki Galeria] Euskal hezkuntza publikoaren greba: irakasleek kanpaldia eta manifestazioa egin dituzte Gasteizen](https://halabedi.eus/wp-content/uploads/2025/04/DSC3561-1024x683.jpg)
Atzo, martxoaren 31n, 19:30etatik aurrera, irakasle talde batek kanpaldia hasi zuen Lakua auzoko Eusko Jaurlaritzaren egoitzaren aurrean, “Lan hitzarmen duina Orain!” lelopean, beren aldarrikapenak ikusgai egiteko eta Hezkuntza Sailari presioa egiteko asmoz.
Gaur, apirilaren 1ean, mobilizazioek jarraipena izan dute Gasteizen manifestazio batekin. Manifestazioa 11:30ean abiatu da Bilbo plazatik, eta antzeko ekintzak egin dira Donostian eta Bilbon ere.
Irakasleen aldarrikapen nagusien artean daude azken urteetan galdutako erosahalmena berreskuratzea, plantillak gaztetzeko neurriak hartzea, lan-kargak arintzea, erretiro-baldintzak hobetzea eta jaiotza-tasaren jaitsieraren ondorioz itxiera eta fusio arriskuan dauden ikastetxe publikoetako lanpostuak egonkortzea. Halaber, hezkuntza-sistema publiko osoa euskalduntzeko politikak, osasun laboralaren zaintzarako baliabideak eta berdintasun-plan egonkorrak eta kalitatezkoak eskatzen dituzte.
Grebaren jarraipenari dagokionez, sindikatuek %75eko partaidetza adierazi dute, baina Hezkuntza Sailak %45ekoa dela dio. Bestalde, Eusko Jaurlaritzak mobilizazioekiko errespetua adierazi du, baina negoziazioak grebak amaitu arte ez dituela berrartuko jakinarazi du, elkarrizketarako “lasaitasun eta barealdia” beharrezkoak direla argudiatuz.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
