Palestina Banatzeko Plan horrek Palestinako britainiar agintaldia bi estatutan banatzea proposatzen zuen, bata judua eta bestea arabiarra. Hala ere, ebazpen horrek Palestinaren erdia baino gehiago proiektu kolonial sionistari eman nahi zion, nahiz eta juduak biztanleriaren herena izan eta lurren % 7 baino ez izan. “Bidegabea eta kriminala” izan zen erabakia, Palestinaren aldeko ekimenak salatu duenez. Izan ere, “adostasun politiko sionista” sendotu zuen lurrak okupatzen jarraitzeko eta palestinarren garbiketa etnikoa gauzatzeko.

Palestinarentzako urterik odoltsuenetako bat da aurtengoa. Elkarretaratzean azaldu dutenez, Gazako Zerrendaren aurkako azken erasoetan erakunde sionistak 19.000 pertsona baino gehiago hil ditu. Datu lazgarri gehiago ere eman dituzte: urriaren 7tik 200 palestinar baino gehiago hil dituzte Zisjordanian; inbasio militarrak izan dira Jeninen, Nablusen, Jerusalemen eta beste herri palestinar batzuetan; eta kolono sionisten indarkeria areagotu egin da palestinarren aurka.

Irtenbide bakarra deskolonizazioa

Palestinarekin elkartasun mugimenduak aldarrikatu du irtenbide legitimo bakarra Israelgo estatu sionistaren desagerpenaren bidetik eman behar dela, deskolonizazio prozesu bati lotuta. “Ibaitik itsasora arteko Palestina aske baten eraikuntza, errefuxiatutako eta erbesteratutako palestinarren itzulera, eta palestinar preso politiko guztien askatasuna ahalbidetuko duena” izan behar du soluzioak, azpimarratu dute. Gogorarazi dute, bestalde, palestinar erresistentziak eskubidea duela erregimen kolonial eta apartheida “bere forma eta adierazpen guztietan borrokatzeko”.

Berriro salatu dute mendebaldeko eta Euskal Herriko erakunde eta enpresen konplizitatea sionismoarekin: “Eusko Jaurlaritzarena, Israelekin segurtasun- eta arma-harremanak hautsi ez dituelako, edo Gipuzkoako Foru Aldundiarena, zeinak iragarri baitu urrezko domina emango diola Palestinako lurren kolonizazioarekin aberasten den CAF euskal enpresako presidenteari”.