“Agur 78” ekimena jarri dute martxan, “erregimena hausteko”
Hala Bediri jakinarazi diotenez Gasteiz mailako ekimen bat izango da. Datozen orduetan sare sozialetara adi egoteko deia egin dute.
Ekimen berri bat jarri dute martxan: “Agur 78”. Sare sozialetan sortutako kontu batek iragarri duenez, “azken asteetan frankismoaren jarraipena den 78ko erregimena inoiz bizi izan duen krisirik sakonenean murgilduta dagoela argi geratu da”.
Kataluniako testuingurua aipatu dute erreflexio hau elkarbanatzeko: “Abiatutako autodeterminazio prozesuak Espainiar Estatua bera kolokan jarri du”.
Hala Bediri jakinarazi diotenez, Gasteiz mailako ekimen bat izango da “Agur 78”. Planteatzen duten erregimenaren haustura hori, azaldu dutenez, “ez da inoiz bide legaletatik emango”. Horregatik, “herritarren antolakuntzan eta desobedientzian” oinarritu nahi dute bidea.
Lo zakuak prestatzeko eta datozen orduetan sare sozialei adi egoteko deia egin dute. Horretarako, twitter kontua jarri dute martxan: @agur78
Egunik, lekurik eta ordurik gabeko egitaraua
Urriaren 11ko gauean, “Agur78” ekimenaren pista gehiago eman zituzten sare sozialetan. Egunik, ordurik eta lekurik gabeko egitaraua aurkeztu dute: bazkaria, kontzrtuak, proiekzioa, ekimena… eta beste hainbat gauza iragarri dituzte.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
