Elkarretaratzea deitu dute Nazio Batuak etorbidea “autobidea” dela salatzeko
Urtarrilaren 18an hamalau urteko neska bat harrapatu zuen kotxe batek, eta larri zauritu zuen.
Nazio Batuak etorbideko 27. zenbakiko zebrabidean egingo dute elkarretaratzea. GOOGLE MAPS
Elkarretaratzea deitu du Auzoan Autobiderik Ez! plataforma sortu berriak urtarrilaren 25ean, 18:00etan, Nazio Batuak etorbideko 27. zenbakian. Zabalganeko eskola elkarteak sortu du plataforma, “arriskutsuak diren auzoko bideak oinezkoentzako seguruak bihurtzeko” helburuarekin. Azken istripu larria iragan urtarrilaren 18an jazo zen. Plataformak gogoratu duen bezala, egun horretan kotxe batek institutura zihoan hamalau urteko neska bat harrapatu zuen, Nazio Batuak etorbideko 27. zenbakiko zebrabidean, eta larri zauritu zuen.
Plataformak deialdia iragartzeko banatu duen esku-orrian azaldu duenez, Nazio Batuak hiribidea auzoa zeharkatzen duen “autobideetako” bat da. “Jundizerako bidean, langile askok abiadura handiz igarotzen dute, oinezkoentzako suposatzen duen arriskua kontutan izan gabe. Ugariak dira orain arte gertatutako istripuak, bai errepide honetan, bai auzoko antzerakoetan”. Auzokideek salatu dutenez, nahiz eta kexa ugari aurkeztu dituzten, Udalak ez die kasurik egin.
Momentuz auzoko hainbat guraso elkarte eta irakasleen klaustroak bildu dira plataformara.
Albiste hau alea.eus-ek argitaratu du eta Creative Commons by-sa lizentziari esker ekarri dugu Hala Bedirara. Jatorrizko albistea eta informazio osatuagoa hemen duzu ikusgai.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
