Irailaren 21ean itzuli zen Muinoko Hotsak Gasteizko Gaztetxera, Libe eta Jupiter Jon taldeekin. Hala Bedik eta Gaztetxeak antolatzen duten ekimenak abendura arteko kontzertuak iragarri ditu, baina urriaren 20an ospatuko diren kontzertuetarako sarrerak amaitu dira.

Gasteizko Gaztetxeak eta Hala Bedik antolatzen duten Muinoko Hotsak ekimena irailaren 21ean itzuli zen oholtza gainera. Filosofia berdina jarraituz, Arabako musika talde bat eta kanpoko beste bat bilduko dituzte muinoko etxean hilabetean behin.

• Irailak 21 |  Libe gasteiztarrek Ilargia erori da diskoa aurkeztu zuten. Azken aukeretako bat izango da boskotea Gasteizen ikusteko, atseden bat hartu aurretik. Gaua borobiltzen, Bidasoa aldeko Jupiter Jon taldea aritu zen, %100 Bidehuts, beraien proposamen interesgarriarekin.
• Urriak 20 | Ohikoa ez den arren, larunbatean izango da urriko jaialdia. Anestesia zarauztarrek duela 25 urte kaleratu zuten Gorrotoaren Ahotsa diskoa eta datozen hilabeteetan kontzertu solte batzuk eskainiko dituzte Euskal Herrian zehar. Haiekin batera, No Regret gasteiztarrak Eres Polvo lanik berriena aurkeztuko dute bero-bero egongo den gaztetxean. Sarrera asko saldu diren arren, oraindik geratzen dira. Sarrera guztiak amaitu dira.
• Azaroak 16 | Azaroan bi proposamen interesgarri izango dira. Batetik, Tara gasteiztarrak, taldearen izen bereko diskoa aurkezten. Eta bestetik, pop elektronikoa egiten duen Lumi bikote lapurtarra.
• Abenduak 14 | Urte amaizeko jaialdiak punk-rock zaporea izango du. D-Tox taldeak Demolición diskoaren aurkezpen bira amaituko du asteburu horretan, ondoren atseden hartzeko. Beraiekin, Bartzelonako Paüra taldea izango da oholtza gainean. Paüra nazioartetik etorriko den lehen taldea izango da.

Sarrerak Hala Bedi Tabernan daude salgai: saio bakoitzeko, 5 euro.