Euskal Selekzioaren aldeko aldarriak Eurokoparen finalean
Gasteizen ere pantaila erraldoi batean eman zuten igandean Eurokopako finala. Protesta ere egin zuten zenbait eragilek, Euskal Selekzioaren alde eta espainolismoaren eta ikur erreakzionarioen aurka.
Eurokoparen finala jokatu zuten Espainiako eta Ingalaterrako selekzioek igandean. Gasteizen (hego Euskal Herriko gainerako hiriburuetan bezala) pantaila erraldoia jarri zuen Udalak partida ikusteko. Askok kritikatu dute hori, espainiar selekzioa nazionalismo espainiarraren eta ideologia erreakzionarioen ikur delako, eta Euskal Selekzioa ukatzen duelako.
Gasteizko hainbat eragilek bat egin zuten igandean bertan elkarretaratze batean, “egoera onartezin” horren aurrean. “Euskal Selekzioaren ofizialtasuna ukatzen diguten horiek, kirolaren eta elkarbizitzaren argudioen bitartez, Espainiar selekzioaren agenda inposatu nahi digute, gure herriak jasaten duen asimilazio nazionala gero eta gehiago sakonduz”, adierazi dute.
Esan dute, gainera, “probokazioa” dela Gasteizko kaleak ikur eta jarrera erreakzionario eta zapaltzailez beteko dituen horrelako ekitaldi bat antolatzea, “espainolismoaren zabalpena” helburu duena eta Euskal Herria “ukatzen” duena.
Udalak herriko taldeak bultzatzeko horrelako egitasmorik inoiz egin ez izana ere arbuiatu dute, eskatu izan zaion arren, eta Espainiako selekzioak jokatu duenean, ordea, zalantzarik egin ez izana.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
