Elikadura eredu alternatiboei buruz hausnartuz, komunitatea eraikiz Judimendin
"Somos lo que nos dejan comer: agroindustriaren aurrean auzoak burujabetza" jardunaldia antolatu du Batuta sareak maiatzaren 13an. Egun osoko egitaraua dute prest Judimendin datorren larunbaterako.
Erosketa saskia nabarmen garestitu da azken urteetan eta agroindustriaren mozkin ekonomikoak, aldiz, areagotu. Arazoaren irakurketa indibidualari buelta emate aldera, Judimendiko Batuta elkarlaguntza sareak “Somos lo que nos dejan comer: agroindustriaren aurrean auzoak burujabetza” jardunaldia antolatu du. Maiatzaren 13an ospatuko da.
Elikaduraz kolektiboki hausnartuz, erosketa saskiaren garestitzearen atzean enpresa handien eredu agroindustrial- kapitalista salatzea dute helburu, egoeraren aurrean eredu alternatiboak eskaintzen dituzten egitasmoak ezagutaraztea eta komunitatea indartzea.
11:00etan SUmendi espazioan mahai-ingurua egingo dute Bioalai, Bionekazaritza eta Herrizomako kideekin. 13:30etan, hamaiketakoaren ostean, tertulia: “Landa eta auzoa hurbilduz. Del campo al barrio”.
15:00etan Judimendiko Eskolara mugitu eta auzo bazkaria egingo dute. Bingo musikatuarekin girotuko dute bazkalostea.
Arratsaldean, 17:30etan, protesta egingo da “Agroindustriaren aurrean auzoak burujabetza” lelopean.
Bukatzeko, 19:00etatik aurrera, musika egongo da Santa Luzia skate park-earen ondoan.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
