Aramaion jokatuko da larunbatean Arabako Bertsolari Txapelketako azken final laurdena
Arabako Bertsolari Txapelketak larunbatean emango dio amaiera bigarren faseari, final laurdenei. Sei bertsolarik parte hartuko dute saioan.
Irudia: Arabako Bertsozale Elkartea
Arabako Bertsolari Txapelketaren final laurdenak bi asteburutan jokatu dira, 3 saio izan dira herri banatan: Dulantzi, Zigoitia eta Aramaion. Azken final laurden erabakiorra, beraz, larunbat honetan jokatuko da eta bertan jakingo da nor izango den finalerdietan.
Zigoitiako saioan Manex Agirrek lortu zituen puntu gehien, 245,5 puntu, hain zuzen ere. Dulantzin, aldiz, Asier Otamendi izan zen garaile 242 punturekin, eta Iñaki Viñaspre atzetik hiru puntuko aldearekin.
Aramaioko hirugarren final laurdena 17:30ean hasiko da larunbatean. Hurrengoak dira kantatuko duten bertsolariak:
- Andere Arriolabengoa Bengoa (Aramaio)
- Asier Rubio Hidalgo (Luiaondo)
- Felipe Zelaieta Txurruka (Mallabia)
- Manuel Bendala Garcia-Donas (Sevilla-Sarria)
- Oihane Perea Perez de Mendiola (Zalduondo)
- Unai Anda Delika (Ametzaga)
Gai emailea Aintzane Irazusta Arzallus izango da.
Bertsozale elkarteak nabarmendu du kantatuko duten bertsolarien artean aipatzekoa dela Andere Arriolabengoa Arabako Kuadrilla arteko 3 ediziotan talde txapelduneko kide izan da. Oihane Pereak 2007ko, 2009ko, 2013ko eta 2017ko Arabako Bertsolari Txapelketak irabazi dituela eta 2012an Arabako Kuadrilla Arteko Txapelketan ere lehena izan zen Lautadako taldearekin batera. Oihane Perea eta Manu Bendala 2021eko Arabako Binakako Bertsolari Txapelketako finalista izan ziren eta bikotea osatu zuten. Unai Anda 2021eko Arabako Binakako Bertsolari Txapelketako finalista izan zen Iñaki Viñaspre bikotearekin batera.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
