2018ko Gasteizko feminizidio bikoitzagatik epaitu dute gizonezko bat, eta erruduntzat jo
Ia lau urteren ondoren, bikote ohia eta haren ama hil zituen gizona epaitu dute. Hilketa bikoitzagatik 47 urteko espetxe zigorra ebatzi du epaileak. through Argia.eus
Hilketa matxistak bat gaitzetsiz 2016an egindako elkarretaratze bat (Argazkia: Ipar Euskal Herriko Hitza).
2018ko apirilaren 20an gizonezko batek 43 urteko Maria Jose Bejarano emazte ohia eta haren 69 urteko ama hil zituen Gasteizen. Berriaren Biktimen Mapan jasotzen denez, erasotzaileak labanaz egin zien eraso, hiltzeraino, eta ostean etxebizitzari su eman zion. Gizonak bere burua leihotik bota zuen, eta suhiltzaileek jarritako koltxonetaren gainera erori ostean atxilo eraman zuten.
Espetxean da ordutik erasotzailea, hilketa leporatuta, ankerkeria eta maltzurkeria larrigarriekin. Herri epaimahaiak pasa den astean jakinarazi zuen haren aurkako epaia, eta asteazkenean eman du bere ebazpena Arabako Probintzia Auzitegiko epaile Elena Caberok: 47 urteko espetxe zigorra, bi hilketengatik. Caberoren begietara gizonak “ankerkeria” erabilita hil zituen bi emakumeak, eta generoa eta senidetasuna astungarri kontsideratu ditu.
Akusatuak “burua galdu” izana adierazi zuen epaiketan, eta horren arrazoitzat bere egoera depresiboa seinalatu zuen. Ildo berean, haren defentsak gizonaren ustezko buru nahasmendua kontutan hartzeko eskatu zuen. Herri epaimahaiak, ordea, ez du halakorik ondorioztatu, eta hilketaren “genero arrazoiengatik” egin zela ebatzi zuen, emazte ohiaren kasuan senidetasuna ere kontutan hartu beharreko arrazoitzat joz.
Fiskaltzak, biktimen familia ordezkatzen duen akusazio partikularrak eta Clara Campoamor elkarteak, hurrenez hurren, 50, 55 eta 60 urteko espetxe zigorra eskatzen zuten akusatuarentzat.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
