Aldaiaberri Guraso Elkarteak manifestazioa deitu du auzoko ikastetxea eraiki dezaten eskatzeko
Eusko Jaurlaritzak lizitazioa 2020. urtea amaitu baino lehen aterako zuela esan zuen. Hau ezinbesteko baldintza da uda honetan bertan eraikuntza obrak has daitezen baina Guraso Elkarteak adierazi duenez, "obrei ekiteko oso aldeko ez diren albisteekin" hasi da urtea.
Jokin Bildarratz Hezkuntzako sailburuak komunikabideetan adierazitakoaren arabera, Aldaialdeko eskolaren prozesua egoera juridiko zailean dago eta ondorioz, Hezkuntza Sailak ez du ikusten ikastetxea eraikitzeko irtenbiderik epe laburrean.
Guraso Elkarteak, ordea, duela urtebete Eusko Jaurlaritzak legezko ezein gaik ikastetxea eraikitzea galaraz ez zezan dena prest zegoela baieztatu ziela salatu du. Hortaz, bere hitza bete ez izana leporatu dio gobernuari.
Auzoko ikasleek bost urte eman dituzte barrakoietan ikasten, eta Hezkuntzako sailburuaren adierazpenek haserrea eta etsipena eragin diete familiei. Haurrek baldintza horietan jarraitzea merezi ez dutela adierazi dute eta egoera desblokeatzeko borrokan jarraitzeko konpromisoan berretsi dira.
Honek guztiak eragiten dizkien kezka eta zalantzak argitzeko eta baita Udalak zein Eusko Jaurlaritzak egoerari irtenbidea ematea eskatzeko, manifestazioa deitu dute datorren larunbatean 12.00etan Bilbo plazatik.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
