Azken hilabeteotan Alokabidek etxegabetu dituen zenbait familia eta Gasteizko  Etxebizitza Sindikatu Sozialistako kideak elkartu ziren atzo, Alokabideren  “etxebizitza sozialetan” bizi diren milaka pertsonak bizi duten egoera salatzeko.

Agerraldian, Alokabidek “bai, etxegabetzen duela” adierazi dute. Etxebizitzako sailburu  Denis Itxasok dio EAEko etxegabetzeak “ia desagertu egin direla” eta Alokabidek “oso  salbuespenezko kasuetan baino ez duela jendea etxegabetzen”. Baina, azaldu dutenez,  Alokabidek berak emandako datuek gezurtatzen dituzte sailburuaren adierazpenak. Aitzitik,  Alokabidek gauzatzen dituen etxegabetzeak “oso salbuespenezko kasuak” izatetik  urrun daude.

Alokabidek berak emandako datuen arabera, Araban 2023an 18 kaleratze gauzatu  zituen; 2024an 34 eskaera aurkeztu eta 24 kaleratze gauzatu zituen; eta 2025ean 41  eskaera aurkeztu eta 20 etxegabetze gauzatu zituen. Horrek esan nahi du lurraldean  hilero ia lau familia etxegabetu zituela batez beste.

Halaber, gogorarazi dute 2025ean Alokabidek ez zuela Araban etxebizitza sozialen  kontratuen %25 berritu; ondorioz, kaltetutako lau familietatik batek etxebizitza utzi  behar izan zuen.

Gasteizko Etxebizitza Sindikatu Sozialistak ohartarazi du datu horiek etxegabetzeen  moratoria indarrean egon zen garaikoak direla, hau da, zaurgarritasun egoeran zeuden  zenbait familiaren prozedurak etenda zeudenean. Sindikatuaren arabera, moratoria  amaitu ondoren kaleratzeen kopurua nabarmen handitzea aurreikus daiteke, eta joera  hori dagoeneko antzematen ari dira etxebizitza aholkularitzetara jotzen duten familien  kopurua handitu delako.

Agerraldiaren bigarren zatian, Sindikatuak salatu du Eusko Jaurlaritzaren etxebizitza politikak errenta ertainak dituzten sektoreak lehenesten dituela, sektorerik  proletarizatuenei zuzendutako baliabideak murrizten dituen bitartean. Azaldu dutenez,  errenta handiagoko familientzat etxebizitza publikoen ehuneko handiagoa gordetzea  eta, aldi berean, egoera zaurgarrienean dauden pertsonen aurkako etxegabetze prozedurak ugaritzea norabide bereko neurriak dira. Horren harira galdetu dute: “Noiz  normalizatu dugu politikariek publikoki eta lotsarik gabe aitortzea beren politikek  klase ertainei baino ez dietela mesede egiten?”

Bozeramaileek Denis Itxasok Alokabidek sustatutako etxegabetzeei buruz egindako  adierazpenak ere kritikatu dituzte. Izan ere, duela hilabete batzuk sare sozialen bidez  adierazi zuen Alokabidek etxegabetzen dituen kasuak “muturrekoak” direla eta beti  direla “beren jarreren ondorioz etxebizitza sozial bat merezi izateari uzten dioten  pertsonak”.

Irakurritako testuan azaldu dutenez, adierazpen horiek pertsona pobreenak  kriminalizatzeko kanpaina zabalago baten barruan kokatzen dira. Haien ustez,  erakundeek eta komunikabideen babesarekin, pertsona pobreenak beren egoeraren  erruduntzat jotzen dituen diskurtsoa indartzen ari dira. Horrela, kontakizun bat  eraikitzen dela azaldu dute: pertsona batzuek etxegabetuak izatea merezi dutela, beren  pobreziaren errudun direlako. Ideia horiek “faltsu eta klasistatzat” jo dituzte Sindikatuko  kideek.

Zenbaki hutsetatik haratago, pertsona horien egoerak ezagutzeko garrantzia  azpimarratu dute prentsa aurrekoan. Errealitate hori azaltzeko, Sindikatuak gogorarazi  du apiriletik hona zortzi familia joan direla bere aholkularitzara Alokabidek hasitako  etxegabetze-prozesuak direla eta. Emandako datuen arabera, familia horietatik zazpik  adingabeak dituzte ardurapean, lau ama bakarrak dira eta batzuek genero-indarkeria  pairatu dute.

Sindikatuaren esanetan, hori da Alokabideren etxegabetze-prozeduren eraginpean  dauden pertsona askoren benetako profila, eta gaitzetsi egin dute pertsona horiek beren  egoeraren erantzule balira bezala estigmatizatzea.

Amaitzeko, erakundeak defendatu du etxebizitza-politika publikoek lehentasuna eman  behar diotela egoera ekonomiko eta sozial okerrenean dauden pertsonak babesteari.  Horregatik, etxegabetze guztiak baldintzarik gabe etetea aldarrikatu dute, eta  Alokabideri martxan dauden etxegabetze-prozedura guztiak berehala geldiarazteko  eskatu diote.

Apiriletik hona, zortzi familiak jo dute Gasteizko Etxebizitza Sindikatuaren  aholkularitzara, Alokabidek hasitako etxegabetze-prozesuei aurre egin behar dietelako.  Zortzi familia horietatik zazpik adingabeak dituzte ardurapean; lau ama bakarrak dira eta  kalean geratu dira; eta, gainera, horietako hiruk genero-indarkeria pairatu dute. Hauxe  da Alokabidek etxebizitza sozialetatik kanporatzen dituen pertsonen errealitatea:

• N., bere ama, 12 urteko anaia eta 2 urteko alabarekin batera etxegabetu zuten.  Ez zitzaien bizitoki-alternatibarik eskaini.
• 35 urte inguruko bikote bat da, lau alabarekin; horietatik bi adingabeak dira.  Zaurgarritasun-egoeran egon arren, Alokabidek ez die kontratua berritu nahi,  arrazoirik eman gabe. Gaur egun etxebizitza uzteko agindua dute eta ez dute  bestelako bizitoki-alternatibarik.
• Bi alaba adingaberen ama da. Zor baten ondorioz etxegabetu zuen Alokabidek.  Genero-indarkeria pairatu ondoren egoera oso zailean zegoen. Zorra zatika  ordaintzea proposatu zuen, une hartan horretarako aukera baitzuen, baina  Alokabidek ez zion erantzun ere egin. Etxegabetu ondoren, lagun baten etxean  hartu behar izan zuen ostatu.
• 10 eta 12 urteko bi adingaberen ama da. Zor bat dela eta etxegabetu nahi dute.  Kontratua amaitu aurretik zorra kitatzeko prest dago, eta horretarako laguntza  ere badu, baina Alokabidek irtenbide hori baztertu du.
• %33tik gorako desgaitasuna duten 67 eta 72 urteko bikote bat da. Zor baten  ondorioz etxegabetuak izan ziren. Etxebizitza berean bizi ziren haien semea eta  haren hiru seme-alaba adingabeak ere. Familia horren zati hori hilabete batzuk  lehenago Alokabideren beste etxebizitza batetik ere etxegabetua izan zen. Gaur  egun furgoneta batean bizi dira, gizarte-zerbitzuek aldi baterako eskaini zieten  alternatiba bakarra adinekoentzako egoitza izan ondoren.
• Adingabeko seme baten ama da, eta zor baten ondorioz etxegabetu nahi dute.  Genero-indarkeriaren biktima da; bere garaian erasotzailea etxebizitzan sartzen  saiatu zen atea apurtuta. Zorra ordaintzeko prest dago.
• Bere kontratua 2026ko apirilean amaitu zen. 2025aren amaieran gutun bat jaso  zuen, baldintzak betetzen ez zituela eta kontratua ez ziotela berrituko  jakinaraziz, baina ez zioten azaldu zein baldintza urratu zuen. Azalpenak eskatu  arren, ez du inolako erantzunik jaso. Jasotako erantzun bakarra etxebizitzaren  giltzak entregatzeko eskatzen zion posta elektroniko bat izan da.
• 50 urte inguruko bikote bat da, hiru alaba adingaberekin. Kontratua 2025eko  urrian amaitu zitzaien. Hasiera batean kontratu berria sinatzea proposatu zieten.  Hala ere, 2025eko ekainean gutun bat jaso zuten, baldintzak betetzen ez  zituztela eta kontratua ez zitzaiela berrituko jakinaraziz, baina ez zitzaien zehaztu  zein baldintza urratu zuten. Prozedura judiziala martxoan hasi zen.