Greba egingo dute bihar eta etzi Arabako erresidentzia pribatuetako langileek
ELA eta LAB sindikatuek deituta greba egingo dute erresidentzia pribatu eta etxebizitza komunitarioetako langileek ekainaren 29 eta 30ean. Sektorearen "lehen hitzarmen probintzial duina" eskatzen dute. Manifestazioa egingo dute ostegunean 11:00etan Plaza Berritik abiatuta.
Arabako zahar etxe pribatuetako eta etxebizitza komunitarioetako langileek beste bi greba egun egingo dituzte bihar eta etzi, ELA eta LAB sindikatuek deituta, lan hitzarmena eskatzeko. Negoziazio mahaia blokeatuta dagoela salatu dute sindikatuek, eta kritikatu egin dituzte patronalaren eta Arabako Foru Aldundiaren jarrera. Manifestazioak deitu dituzte, ostegunean Plaza Berritik abiatuta eta ostiralean Albertia Campus egoitzatik irtenda.
Lau urte igaro dira arlo honetako langileek protestak hasi zituztela, baina patronalaren aldetik ez dute erantzun positiborik jaso. Hala, “egoera prekarioan” jarraitzen dute erresidentzia pribatu eta etxebizitza komunitarioetako langileek, sindikatuen esanetan. Lanaldi luzeak, soldata baxuak, ratio altuak eta beste hainbat arazo aipatu dituzte hitzarmena esaktzeko deialdietan, eta salatu dute ohikoak bilakatu direla langileak “gaixoarazten” dituzten lanaldiak.
Deitzaileek nabarmendu dute garrantzitsua dela zahar etxeetako erabiltzaileak “duintasunez” zaintzea, baina dauzkaten lan baldintzen ondorioz ezin dutela kalitatezko zerbitzua eskaini, edo haien osasun egoera kaltetzea ekartzen duela ordainetan.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
