Erraietatik: ERRAIETATIK vol. 46 | ¡Ni una más!
Aste honetan, Beñat Fontaneda zinegile gasteiztarra izan dugu ERRAIETATIK irratsaioaren lehen zatian. Pasa den asteburuan, hiru egunez luzatu den rodajean burubelarri ibili da Beñat, emakumeen kontrako indarkeriaren inguruko thrillerra izango den laburmetraia filmatzen: ‘Ni una más’ da film labur honen izenburua, pelikularen muina argi utziz.
Gainera, film labur hau ‘La Sirena’ luzemetraiaren aurrerapen bat baino ez da, Fontanedaren hitzetan, hiru edo lau urte barru errealitate bat izango den proiektua.
Azken lan hau bere karrerako inflexio-puntu bat bada ere, Beñat Fontaneda aspaldiko ezaguna da gure hiriko ikusentzunezkoen munduan. Besteak beste, ‘El Círculo de la Violencia’ (2007), ‘Lucía’ (2009), ‘Corten’ (2009) edo ‘¡Qué Corto!’ (2010) film laburrak egin ditu. Dokumentalen sorkuntzan ere aritua da Beñat, tartean, ‘Garden 1999-2001’ -bere taldea izandakoaren inguruan-, ‘Euskal Herriko Nonbait’ (2013) edota ‘Gora Gasteiz’ (2016).
Hortaz, lan honen inguruan, bere ibilbideaz, etorkizunaz eta euskal zinemagintzaren panoramari buruz hitz egin dugu berarekin.
Hona hemen, ‘Ni Una Más’ film laburraren grabaketa prozesuaren irudi batzuk (argazkiak: Jaizki Fontaneda):
Irratsaioaren azken zatian, feminismoa ardatz, Pikara Magazineko Andrea Momoitio eta ‘O No Será / Edo ez da izango’-ko -feminismoen inguruko Hala Bediko irratsaioa- Amaia Villanuevaren arteko solasaldia ekarri dugu gurera, pasa den astean, Pikara Magazineren 6. urtekariaren aurkezpenaren harira, Hala Bideoko lagunek argitaratutakoa: ‘Halabeditarrak | Pikara Magazine y O No Será, tejiendo redes feministas en el espacio comunicativo’. Bertan, hedabideak, komunikazioa, feminismoa, aliantzak, elkarlana eta bestelako gaian izan zituzten mintzagai.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
