Humanismoaren itzalaldia
Rassemblement sur le pont Santiago d’Hendaye à la frontière Labourd / Gipuzkoa suite à la mort d’une personne migrante ce week-end, ici le lundi 22 novembre 2021.
Europa mendebaldean covid pasaportea erabili beharko ote dugun edo ez, gabonak lasai ospatzeko aukera izango ote dugun edo ez, edota noiz izango ote den energia itzalaldia, horiek gure kezkak. Beste batzuk askoz ere oinarrizkoagoak diren kezkak dituzte. Bielorrusia eta Poloniaren arteko mugan hotzez nola biziraun, nola lortu nahikoa janari gosez ez hiltzeko edota gerratik nola alde egin.
Azkeneko egunetan, berri ilunak datoz munduko mugetatik. Ez dugu oso urrun joan beharrik gertaera latzak ikusteko. Bidasoa ibaian hil berri da hegoafrikar jatorriko mutil gazte bat. Sei hilabetetan ibaia gurutzatze ahaleginetan zebilen hirugarren hildakoa hain zuzen ere. Beste lau ere hil dira ibaiaren ondoan edo trenak botata. Bielorrusia eta Poloniaren arteko mugan gutxienez bederatzi pertsona hil dira muga pasa nahian. Ehunka lagun daude hesiaren inguruan akanpatuta eta milaka inguruko basoetan zeropeko tenperaturak jasaten eta goseak.
Gutxienez 75 hildako izan ziren Libiako kostaldean ontzi irregular bat hondoratuta aurreko astean. Mediterraneoa zeharkatu eta Europako kostaldera iristeko asmoa zuten. Zawara hiriaren aurrean gertatu zen, Mediterraneo Erdialdeko migrazio-ibilbidean gertatu den gertaera larrienetako bat. Pasabide hau pasatzen saiatu diren milaka lagunetatik 1300 hildako egon dira aurten.
Zoritxarrez herritarrak “ohitzen” hasi gara horrelako berri ilunak entzuten eta gure erantzuna beharko lukeena baino xumeagoa izaten ari da. Boterean daudenek, berriz, hesiak jartzen ari dira segurtasunaren izenean. Justu kontrako erantzuna ematen ari dira beraz. Pasabideak seguruak izan ditezen lehenbailehen neurriak hartu beharra dituzte instituzioek baita etorkinei harrera duina eskeini ere. Iluntasun honetatik irten eta argitasunaren bidea da bilatu behar duguna.
Alaitz Amundarain
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
