Argazkia: Arabako Bertsozale Elkartea

Indartsu dago Arabako bertsozale komunitatea. Bat baino gehiago izan ginen larunbateko finalerdirako sarrera ozta-ozta lortu genuenak, Aramaioko Kultur Etxean sold out kartela eskegiko zutenik ez baikenuen aurreikusi. Pozik ginen beraz entzuleak.

Etxaun Otaño gai jartzailearen atzetik sartu ziren Eli Zaldua, Unai Anda, Iñaki Viñaspre, Ekaitz Samaniego, Manex Agirre eta Peru Abarrategi bertsolariak. Azken biak aramaioarrak: saioaren garailea eta aurreko txapelduna, hurrenez hurren.

Entzuleok pozik, eta txapelketak dakarren urduritasun eta ezinegonak alde batera utzita ziruditen bertsolariek ere. Hala kantatu zuen Eli Zalduak hasierako agurrean: «zenbat buruhauste, total berdin gelditzeko kutre», eta ahal zuen beste gozatzera zetorrela. Adar jotzeak eta aldarrikapenak izan ziren agurretan batez ere lekua hartu zutenak.

Hasi zen saio puntuagarria. Zortziko handia. Bi auzokide solasean, gaztetan Andaluziatik migratu eta neskame aritu ostean, orain 80 urterekin, etorkin bana kontratatu dutenak norbera zaintzeko. Kontraesanean murgilduta dauden bi pertsonaren ahotsak izan ziren Eli Zaldua eta Unai Andarenak. Unairen «nik nahi nukeena da hau egiteko beharrik ez izatea» esaldiarekin itxiz eztabaida.

Manex eta Peruk, aldiz, udaltzainek bankutik bota dituzten bi etxegaberen gorputzetik kantatu zuten. Dotore aritu ziren biak ere, injustizien aurka eta bizitzaren alde: «etxean edo etxerik gabe / bizitza da handiena» bukatu zuen Manexek.

Hamarreko txikian Eli Zaldua eta Iñaki Viñaspre bi anai arrebaren paperean jarri zituzten. Gurasoak duela urte batzuk banatu ziren eta orain bikote berriak dituzte. Eli pozik dago, Iñakik sentimendu kontrajarriak ditu ordea. Etxerik etxe, bere lekua ezin topatu dabilen haurra ekarri zuen Viñaspreren ahotsak, eskerrak emanez arrebari bukaeran beti ondoan izan duelako.

Ganbarako lanean ere maila eman zuten bertsolariek. Etxera bueltatu zara azkenean. Ez da izan espero zenuen moduan. Ekaitz Samaniegoren bertsoak ekarriko ditut hona, ederrak izan baitziren:

«Zortzi urtez preso egon

ta ireki dute atea

berriz ere naiz itxuraz

lehen nintzen bezain askea.

Etxea berriz ikusi

ta txikitako parkea,

nahi nuen buelta ederra

ideala izatea.

Baina hortxe hasi egin zen

laguntasunen eskea

hutsik zegoen nire ondoko

konpainiaren partea.

Eta horrela dijoa

zailtxo leheneno urtea.

Ez da erraza izaten

espektatibak haustea.

 

Errealitatea izaten da

noizbait horren krudela.

Betea nun egunero

jaki goxoez sabela

eta goraino zijoan

hutsunearen nibela.

Baina hori ez zen izan

nire buruaren eskela,

jaso dut lagun berrien

laguntza oso epela.

Denbora eman behar zitzaion

ta ezin zen izan bestela,

orain pozik esango dut

sentitzen dudan bezela

bizitza berreraikitzen

oso gogoz nabilela».

Hunkituta entzun genituen bertsolarien agurrak. Hunkigarriak izan ziren horiek ere. Senide eta lagunez oroitu ziren Peru eta Manex. Zaballako bertso eskolaz Viñaspre. Elik laguntasunari kantatu zion berriro, Ekaitzek bezala. Arabako  bertsolaritzaren ezaugarria da akaso lehiaren aurkakotasuna.

Manex Agirrek irabazi zuen saioa eta martxoaren 16ko finalerako sailkatu horrela. Asteburu honetan jokatuko da hurrengo finalerdia.

Hauxe sailkapena:

372 punturekin Manex Agirre garaile

365,5 Peru Abarrategi

354 Iñaki Viñaspre

337 Unai Anda

331,5 Eli Zaldua

305 Ekaitz Samaniego