Gasteizko Udalak, Ihoberekin batera (Eusko Jaurlaritzaren ingurumen-jarduketarako sozietate publikoa), bero-boladetatik babesteko proiektua aurkeztu du. Babeslekuak, berdeguneak eta zuhaiztiak egingo dituztela iragarri dute. Benetako Green kolektiboak salatu duenez, proiektu hori Gasteizko Udalaren politiken «koherentzia falta garesti eta kezkagarriaren» erakusle da, hirigintzari eta klima aldaketari egokitzeko neurriei dagokionean.

Izan ere, azken urteetan Gasteizko espazio publikoaren gestoreek hartutako erabakien ondorioak salatu ditu Benetako Green kolektiboak: batetik, zuhaitzak masiboki moztu dituzte eta ez dagokien garaian; bestetik, plazak eta kaleak birmoldatu dituzte, asfaltoa lehenetsiz eta berdeguneak desagerraraziz. «Ubanismo gogorra» deitu diote Udalak jarraitu duen eredu horri eta ohartarazi dute gainontzeko hirietako tendentziaren guztiz kontrakoa dela, hiriguneak «berdetzea» baita joera orokorra. Gasteizko eredu horren adibide bezala aipatu dituzte Santa Barbara Plaza, Berpizkundearen Plaza, Judimendiko Sefarad Plaza, San Martin auzoko udal bulego berrien pareko plaza, Zabalganako Gizarte Etxearen ingurua eta San Francisco kalearen birmoldaketa.

Benetako Greenek Udalari exijitu dio kaleen eta plazen erreformen ereduan aldaketa «erradikala» egin dezala, hirian zuhaitzak jartzeko plan batekin, eta klima aldaketaren ondorioak arintzeko «politika argi bat» izan dezala, beroari aurre egiteko, bereziki.

Hiri-zuhaitzen kudeaketa Espazio Publikoaren Sailak bere gain hartu dezala ere eskatu dute. Gainera, ordenantza berri bat, plan zuzentzaile bat, behatoki bat eta hiri-zuhaitzen balioa handitzeko kanpaina bat beharrezkoak direla azaldu dute, Gasteizen bizi diren pertsona guztiek aukera izan dezaten hiri-berde orokorraren eta, bereziki, zuhaitzen onura kontaezinak ezagutzeko.