Jaurlaritzak Gasteizko Mendietako Kontserbazio Bereziko Eremua 5.000 hektarea ingurura zabaltzeko asmoa duela ezagutu eta gero, Ekologistak Martxan talde ekologistak gogor kritikatu du erabakia, eta horren zabalpen «urria» egiteko hartutako erabakiaren atzean «irizpide politikoak» daudela uste du.

Ekologistek babes eremu hori are gehiago handitu nahi zuten —9.000 bat hektarea, ekialdera eta mendebaldera—, baina, helarazi duten ohar baten arabera, Jaurlaritzak uko egin die ekologisten proposamenei. Horregatik, uste dute proposamena Jaurlaritzak ingurumenaren alorrean egin duen «zentzugabekeria handienetakoa» dela, eta erabakiak «gako» diren hainbat zati alde batera uzten dituela. Horrek Arabako eta Euskal Herriko biodibertsitaterako «ondorio larriak» ekarriko dituelakoan daude ekologistak.

«Proposamen horiek aintzat ez hartzeko Eusko Jaurlaritzaren erabakia interes politikoei dagokie, zientzia eta ingurumen irizpideei baino», kritikatu dute. Zehazki, sinetsita daude erabakiaren zio bakarra dela Azazetako parke eolikoari «eragozpenik ez jartzea». Hori dela eta, Jaurlaritza eskatu diote kontua berriz pentsatu dezala.