Hurrengo egunetan Ertzaintzak emandako bertsioaren araberam atxilotuak bi ertzaini eraso egin zien, baina hori «faltsua» dela azaldu zuten Legutioko gazteek, eta gertatutakoa «muntai poliziala» dela. Martxoan zehar atxiloketa eta esku-hartzea gogor salatu zituzten Desjabetuen Hoteleko kideek, «salbuespen neurri politikoek indar polizialei emandako inpunitateari esker» ematen direla eta. Atxilotuaren «berehalako» askatasuna exijitu zuten eta «elkartasun osoa» adierazi hurrengo egunean egindako elkarretaratzean.

Joan den hilean, irailaren 9an, «muntai-polizialean» parte hartu zuten ertzainek deklaratu zuten eta, «espero bezala, gezurrak esan» zituzten, Legutioko kaleetan zabaldu den ohar baten arabera, Arabako Aleak jakinarazi duenez. «Erasoaren sortzaile» izatea leporatzen dioten ikertutakoaren deskibapen fisikoa, esan dutenez, ez dator pertsona horren itxurarekin bat. Pertsona hori, gainera, etxean omen zen egun hartan.

Istiluetan bertan atxilotutako lagunari agintaritzaren aurkako atentatua, erresistentzia eta desordena publikoak egozten dizkiote. Atxilotu zuen ertzainak lesioen mediku-txosten «faltsua» aurkeztu duela salatu dute oharrean: «Atxilotuak ez zuen inongo momentuan ertzainari eraso egin. Jakina denez, ez zuen atxiloketaren aurka egin eta ez zen desordena publikorik egon. Honako guztia ikusizko materialen bitartez dokumentatuta dago». Deklaratuko duen hirugarren pertsonari agintaritzaren aurkako atentatua leporatu diote.

Urriaren 20an, asteazkena, epailearen aurrean deklaratuko dute hirurek. «Akusazio faltsuen, existitzen ez diren delituen eta Ertzaintzaren muntaiaren aurrean» errugabeak direla defendatuko dute. Egoera horren aurrean elkartasuna eta babesa adierazteko elkarretaratzea egin zuten atzo, igandean, Legution.