Larunbat honetan, irailak 24, Gasteizen izango da Sultana Jaya giza eskubideen aldeko ekintzaile sahararra. Jaya urte eta erdi baino gehiagoz atxilotu zuten bere etxean, legezko justifikaziorik gabe.

Datozen egunotan, Mendebaldeko Sahararen egungo egoera azalduko da Euskal Herrian, hainbat hitzaldiren bidez. Sahara Koordinazio Unitateak antolatu du bisita. Gasteizen, Polisarioak Euskadin duen Ordezkaritzak, SEADen Lagunen Elkartearekin eta diasporako erakunde sahararrekin batera, herritarrei dei egin die Andre Maria Zurian egingo zaion ongi etorrira gerturatzeko, 12:00etan. Ondoren, harrera ekitaldia egingo da Aldabe gizarte etxean.

Sultana Jaya erresistentzia baketsuaren sinbolo bihurtu da eta Saharako beste emakume askoren aurpegia da, hain zuzen ere, beren ahotsak eta gorputzak arma bakartzat hartuta egunez egun okupazioari aurre egiten dioten emakumeena. Joan den ekainean, giza eskubideen defendatzailea Kanarietara iritsi zen, Marokoko segurtasun indarrek 558 egunez Bojadorreko etxean setiatuta egon ondoren, Mendebaldeko Saharako lurralde okupatuetan bizi diren sahararrek jasaten duten jazarpenaren, eta, bereziki, saharar herriarentzat autodeterminazio-eskubidea eta askatasuna aldarrikatuz politikoki nabarmentzen direnek jasaten duten jazarpenaren erakusgarri.

Etxean setiatuta bizi izan zen denbora guztian, Sultana Jayak eta bere familiak etengabeko erasoak eta eraso fisiko eta sexualak jasan zituzten poliziaren eta gorputz paramilitarren aldetik. Haren kasua Nazio Batuen aurrean salatu zuten prestigio handiko nazioarteko erakundeek. 2021ean giza eskubideen hainbat saritarako hautagaitza aurkeztu zuten, besteak beste, Europako Parlamentuaren Sajarov sarirako eta Eusko Jaurlaritzak deitutako Ignacio Ellacuria eta René Cassin sarietarako.