Ikasle Abertzaleek prentsaurrekoa egin dute gaur, martxoak 28, Gasteizko Letren Fakultatean, pasa den martxoaren 24ko greban egon ziren 34 atxiloketak salatzeko. Izan ere, IAk deitu zuen ikasle grebaren baitan, piketeak egin ziren goizean campusean (langile zein ikasle grebetan ohikoa denez). Egun hartan, ordea, Elurretako fakultatean polizia bortxaz sartu, ikasle asko identifikatu eta 34 atxilotu zituen egunean zehar.

Jazarpena eta errepresioa salatzeko, manifestazioa deitu dute ostegun honetan, martxoak 31, Elurretatik abiatuta 11:00etan. Atxilotuen erabateko absoluzioa eskatzea, poliziaren jazarpena eta EHUren jokabide autoritarioa salatzea da mobilizazioaren helburua.

IAk salatu duenez, errepresio hori guztia EHUko Arabako errektoreordetzaren eta errektoretza nagusiaren erabakiz eta horiek baimenduta egin zen. «Gure ustez, astakeria bat da pikete batzuek egiteagatik 34 atxilotu egotea; baita, oro har, unibertsitatea campus polizial bilakatzea ere. EHUk unibertsitatean poliziaren inpunitatea baimenduz gero, ikasleon greba oro kriminalizatzeko aurrekari oso arriskutsua ezatzen du», salatu dute. Ezarri nahi duten Bizikidetzaren Legearekin lotu dute hori.

Masa komunikabideen kriminalizazio

Gertakariak «erabat manipulatzeaz gain», atxilotuen seinalamendu publikoa ahalbidetzea egotzi diete hainbat masa komunikabideri. Hezkuntza publikoaren aldeko greba egun batean mobilizatutako ikasleak «kriminal» edo «unibertsitate publikoaren kontrako subjektu» gisa aurkeztu nahi izatea salatu dute.

Askatasun politikorik ez EHUn

IAren arabera, «ezin da politika askatasunez egin une oro jazarpena badago»; horregatik, EHU «progresismoz mozorrotzen bada ere», «autoritarismoarena» da bere benetako aurpegia. «Zer nolako unibertsitatea da bere ikasleak masiboki atxilotzea baimentzen duena? 34 ikaslek egun osoa ziegan igarotzea baimentzen duena?» galdegin dute.