Neurria: Hamarreko handia    Doinua: “mutil koxkor bat itsu aurreko”

• Mikel Lacalle: Koronabirusari jarritako bertsoak
  00:03:49
  19  0 0

“Dinosauroak jarraitzen zuen

hor bera esnatu zenean”

ipuin zoragarri hau omen da

motzena denen artean;

Augusto Monterrosok idatzi

zuen pasa den mendean,

mila bederatziehun eta

berrogeita hemeretzian,

eta nik orain berpiztu nahi dut

itxialdiaren ostean.

Koronabirus jartzen badugu

dinosauroren tokian,

ipuina errepika dezakegu

antzekotasun handian:

Konfinamendu-amesgaiztotik

ni esnatu nintzenian

koronabirus ere hor zegoen

edozein gizakirengan,

elkarren etsai bihurtu gara

errealitate berrian.

Denok dakigu birus honekin

bizi beharko dugula,

historian zehar beti izan da

antzekoa joko-taula.

Normaltasun berrian sartzean

alda daigun pelikula,

pandemia eragin duten zioak

buelta ez daitezen sekula,

borrokari jarraitu beharko

ez dago beste formula.

Desberdintasun, prekarietate,

patriarkatuaren aurka;

pribatizazio, kontsumismoa

bazter ditzagun mailuka;

naturaren esplotazio eta

militarizazio uka,

bestearekiko beldurra ere

apur dezagun musuka,

eta mundu berri baten alde

egin dezagun oihuka.

Krisi honetatik zerbait ikasi

badugu hau da nire ustez:

hurrengo krisialdietarako

prest egon behar nahitaez.

Horretarako elkartasuna

landu behar derrigorrez,

sare komunitarioak eraiki

elkar laguntzeko adorez;

modu honetan indartsuago

bihurtuko gara izatez.