Urte bete igaro du DETESAko Langileen Batzordeak zuzendaritzarekin Enpresako Hitzarmen «duin» bat negoziatzen, «langileen beharrei eta gaur egun enpresan bizi den prekarietateari aurre egingo dion testu bat lortzeko asmoz». Langileen aldarriei erantzuteko enpresak erakutsi duen borondate faltaren aurrean mobilizatzeari ekin diote langileek.

Astelehenean ekin zioten lanuzteak egiteari eta aste osoan zehar luzatu dira mobilizazioak. Bihar, ostirala, dute antolatutako azken paroa. Aldi baterako kontratuak kontratu mugagabe bihurtzea da langileen aldarri naguenetako bat, beharginen proportzio altu batek epe mugatuko kontratuak dauzka, langile hauek burutzen dituzten lanak lan estrukturalak diren arren: «behar tenporalekin zerikusirik ez duen lana».

Soldata arrakala ere oso sakona da DETESAn, sartzen diren langile berriek enpresan urteak daramatzaten langileek baino soldata askoz baxuagoa jasotzen dute lan berdinak burutzeagatik eta denbora asko igaro beharra dute lansariak parekatzeko.

ELA sindikatutik Hitzarmen Kolektibo «duin» baten beharra aldarrikatu dute, «epe mugatuko langileek eta enpresan sartzen diren gazteek sufritzen duten prekarietateari aurre egiten lagunduko duena». Zuzendaritzaren blokeo nahiaren aurrean mobilizatzen jarriatuko dutela adierazi dute langileen ordezkariek. Bihar dute aste honetako azken lanuztea baina ez dute protesta gehiago egitea baztertu.

Alestis enpresan ere lanuzteak

Alestis enpresan ere paroak egiten ari dira aste honetan zehar urtarrilean kaleratutako langile baten egoera salatzeko. Mezu argi bat bidali nahi diote zuzendaritzari, ez dutela kaleratze librerik onartuko.