Arantzabela ikastetxeko jolastokian duela gutxi egindako ortzadarren koloreko muralean LGBT+ kolektiboaren aurkako pintadak agertu ziren astelehenean. Arantzabela ikastetxeak berak sareetara igotako argazkietan «putos gays”, “fuck LGTB” eta “maricones” bezalako mezuak ikusi zitezkeen muralaren gainean.

Ikusgunek, Gasteizko LGTBI+fobiaren aurkako Behatokiak, gertakaria erregistratu du eta laguntza emateko prestutasuna adierazi dio ikastetxeko hezkuntza-komunitate osoari. Gertatutakoa «larritasunez» ikusten dutela adierazi dute ohar batean Ikusguneko kideek. Izan ere, ez dira Gasteizen ikusten diren horrelako lehenengo margoketak, ezta horma-irudiak erasotuta agertzen den lehen eskola ere. Iazko ekainean, adibidez, Umandi ikastolan,  ‘Esto con Franco no pasaba!’, ‘Transformers no!’ eta ‘Marikas’ margoketa homofoboak eta transfoboak egin zituzten ezezagun batzuek LGTBI+fobiaren kontrako muralean.

Gasteizko eskola-komunitateek ere gogor salatu dute Arantzabelako erasoa. Gaur, osteguna, elkarretaratzea egingo dute Arantzabela eskolako patioan 17:15etan. «Muralak dioen moduan, maitasunagatik, berdintasunagatik, askatasunagatik, errespetuagatik, aniztasunagatik, harrotasunagatik, eta nola ez, duintasunagatik, ez gara isilduko horrelako erasoen aurrean!», adierazi dute eskolaren sare sozialetan. Gasteizko gutxienez hamar ikastetxe eta ikas-komunitatek adierazi diete babesa Arantzabelako kideei eta elkarretaratzeak ere deitu dituzte.