Gaurko, ekainaren 28rako, zegoen ezarrita Legutioko Desjabetuon Hotela Zentro Sozialistaren hustea. Protesta gisa eta elkartasuna antolatzeko, aurreko bi egunetan hainbat ekimen antolatu dituzte Legution. Gaur goizeko 9:00etarako Desjabetuon Hotelean ziren dozenaka lagun, goizean bertaratutakoak zein gaua Legution bertan igaro dutenak, espazioa babesteko.

Goizean zehar, Ertzaintzarekin eta sarrailagilearekin batera joan dira eraikinaren legezko jabeak eta sarrailak aldatu dituzte. 11:30etarako Ertzaintza eraikinaren barruan zen, desalojo agindua gauzatuz.

Lehen ordurako itxi dituzte kaleak ertzainek. Gedar langile kazetak kontatu duenez, desalojoari aurre egiteko hotelaren aurrean elkartu den jendearen aurka oldartu dira, lehen aldiz sarrailagilea sarrailak aldatzen ari zenean eta, bigarrenez, poliziek hotelaren aurreko alde osoa hartu dutenean.

Hedabide beraren arabera, hogei inguru izan dira Ertzaintzak kargetan zauritutakoak. Pertsona batek traumatismo kraneoentzefalikoa dauka eta grapak jarri dizkiote. Beste batzuei erradiografiak egin beharko dizkietela esan dute.

Ertzaintzak bi pertsona eraman ditu atxilo. Gaur arratsaldeko 17:00etan kontzentrazioa deitu dute Legutioko plazan, atxilotuak askatzea exijitu eta Desjabetuon Hotelaren desalojoa salatzeko.