Uztailaren 4an, ostegunean, Arabako Aldundiko Diputatu Nagusiaren kargu-hartzeko bilera ospatuko da. Sindikatu ezberdinek –LAB, CCOO eta ESK-, ordea, data aprobetxatuta, Arabako Gizarte Zerbitzuetan ematen ari den «egoera prekarioa» salatzeko elkarretaratze bat zuten deituta; debekatu dieten elkarretaratzea.

Espazioa -Probintzia Plaza- hartuta dagoela jarri zieten aitzakitzat sindikatuei, baina eskatu dituzten beste leku batzuei ere ezetz esan zieten «politikoek hartutako lekuak zirela» argudiatuta. Sindikatuek, gainera, erantzuna soilik telefonoz jaso dutela gaitzetsi dute, idatziz beharrean. «Mehatxua ere jaso genuen: elkarretaratzea egiten bagenuen, isunak izango genituela», salatu dute Probintzia Plazatik gertu egindako agerraldi batean.

Elkarretaratzearen asmoa, argia zen: Arabako Foru Aldundiak gizarte zerbitzuen gestioaren gehiengoa esku pribatuen esku uztea erabaki duela. «Zerbitzu hauek, diru publikoarekin ordaintzen dira eta gestio pribatuetako enpresen eskuetan uzten dira», gaitzetsi dute.

Bizitzak, erdigunera

LAB, CCOO eta ESK sindikatuen iritziz, argi dago zein den arrazoi nagusia elkarretaratzea oztopatzeko: «EAJ eta PSE alderdiek argazki faltsu bat nahi dute, haien politikek eragiten dituzten errealitateak bertan ez agertzeko».

Bide batez, Ramiro Gonzalez jeltzaleari ez direla isilduko esateko baliatu dute agerraldia: «Azken lau urteetn zerbitzu sozialen pribatizazioarekin jarraitzen baduzue, aurrean izango gaituzue».

Zentzu honetan, sindikatuen iritziz desparekotasunarekin bukatzeko bide bakarra «pertsonen bizitzak eta duintasuna erdigunean» jartzea da. «Premiazkoa da», amaitu dute.