Gehiengo sindikalak kontzentrazio bateratua egin du gaur, urtarrilak 13, azken lan istripu hilgarria salatzeko. «Lan istripu gehiagorik ez! Prekarietatea hiltzailea» lelopean egingo dute elkarretaratzea ELA, LAB, ESK, STEILAS, EHNE, eta HIRU sindikatuek.

Astelehenean hil zen 47 urteko langilea, Olarizuko obretan izandako istripuan. Eguerdi aldera izan zen ezbeharra: langile bat aldamio batetik erori eta hil egin zen, unean bertan. Azpikontratatutako enpresa bateko langilea zen. 2020an, modu berean hil zen beste langile bat Olarizu auzoan bertan.

Gutxienez 3 langile hil dira aurten Euskal Herrian, eta 62 izan ziren 2021ean. LAB sindikatuak, ohar batean, EAEko administrazioak lan istripuak ekiditeko hartutako neurrien eraginkortasun falta salatu du. Oso ohikoak dira  altueretatik erorita gertatutako lan istripuak eraikuntza sektorean; prekarizazioa, azpikontratazioa eta sektore honetako lan-baldintzak dira arazoaren erroa, LABen arabera. Eskatu dute, oroz gain, «erakundeen inplikazioa eta sektore honetarako plan espezifiko bat, neurri egokiekin benetako prebentzio politikekin».

ELA sindikatuak Eusko Jaurlaritzari eta patronalari exijitu die «berehala ezar ditzatela prebentzio-legeriaren ez-betetzeak kontrolatzeko eta jarraipena egiteko neurriak».