Atzo arratsaldean hasi ziren Gasteizko Alde Zaharreko Zaharraz Harro jai herrikoiak. Lehenago beste ekintza batzuk hasita bazeuden ere, arratsaldeko 18:30etan bota zuten txupina Bollerias plazan, eta “100 urte, bakarrik ezin da” dinamikako kideei eman zieten jaiei hasiera emateko ardura. Ondoren turistifikazioaren aurkako kalejira bat egin zuten, Eli Zaldua eta Ekaitz Samaniego bertsolariek girotuta.

Txupina botatzera igo ziren Bollerias plazako eszenatokira Auzolana, Gasteizko Gaztetxea, Errekaleor, Sumendi eta Hala Bediko kideak, aurten urteurren bateratua ospatzen ari direnak. Autogestioa, parte-hartzea eta auzo harrotasuna goraipatu zituzten bertan, eta Zaharraz Harroren oinarrietan dagoen okupazioa ere aldarrikatu zuten. Denen artean “Alde Zaharra eta Gasteiz bizigarriago” egiten dituztela esan zuten, eta “gure auzoak eta hiria elikatzen jarraitzeko hautua” egin dutela adierazi zuten.

Ekintza ugari daude antolatuta igandera arte, Zaharraz Harroko jai parte-hartzaileen egitarauan.