Aurtengo maiatzean eta ekainean Arabako metalean egindako protestetan parte hartu zuten langileak zigor ekonomikoak jasotzen hasi direla salatu du ELA, CCOO, LAB, USO, ESK eta CGT sindikatuek osatutako Intersindikalak.

«Berriro ere, Ertzaintza, Eusko Jaurlaritza buru duela, patronalaren eta enpresa handien alde jarri da, segurtasun pribatuko zerbitzu gisa jardunez, eta zerbitzu publikoaren betebeharra alde batera utzita», adierazi dute. Poliziaren» borrakadak, bultzadak eta mehatxuak» zigorrik gabe geratuko direla arbuiatu dute, «grebarako eskubide legitimoa baliatzen zuten» metalaren sektoreko langileak zigortzen dituzten bitartean.

Bereziki larria dela azaldu dute greba-batzordeak Ertzaintzari enpresa batzuek grebarako eskubidea urratzen ari ote ziren egiaztatzea eskatzean hartutako jarrera: «Oinarrizko eskubide hori ez zen bermatua izan, Ertzaintzak grebalarien oinarrizko eskubide hori eragotzi zuen. Hori ez ezik, piketeei zuzenean galarazi zitzaion langileak informatzea».

Ezarritako isun guztiak etetea eskatu dute, eta izapidetzen ari diren zehapen guztiak geldiaraztea.

«Lakuatik udazken beroa iragartzen denean, badirudi ez duela zalantzarik izango bere polizia-indarrak langileak erreprimitzera bidaltzeko, beren baldintzen edo lanpostuen alde borrokatzen duten bitartean. EAJ-PSE, berriro ere, kapitalaren zerbitzura», ebatzi dute.