Euskal Herriko periferiak erdigunera ekartzeko asmoarekin «Zizelkariak» dokumentala ekoiztu du Topatuk, Euskal Herriko sei ertzetan hainbat arlotan borrokan ari diren sei gazteri ahotsa emanez. Topatuk ekoizturiko laugarren dokumentala da honakoa, aurretik «Tximeletak», «Arrakala» eta «Gure kabuz ala hil» lanak aurkeztu dituelarik.

Euskal Herriko periferia geografikoetan bizi diren sei gazteren bizipenak eta esperientziak bildu ditu dokumentalak, «ertzetako borroketatik Euskal Herri bat irudikatzeko», Tartean Arabar Errioxako gazte asanbladako kidea den Jonen bizipenak.

Eraikuntzaren eta inurri lanaren garrantzia azpimarratu nahi du dokumentalak, Gazte Mugimenduetan egiten den eguneroko lanari ikusgarritasuna emanez. Periferiak eridgunera ekarri eta Euskal Herriaren irudikapen bat egitea ere du helburu Topaturen laugarren dokumentalak, periferiekiko dauden aurreiritziak hautsiz.

Crowdfunding kanpaina jarri zuten martxan egileek eta baita hau gainditu ere. Jasotako ekarpen ekonomikoekin dokumentalaren ekoizpenak dituen gastuei egin ahalko diote aurre.

Aurkezpen bira, urtarrilean Araban

Iragan azaroaren 30ean burutu zuten Tuteran «Zizelkariak» dokumentalaren aurkezpena. Hurrengo hilabeteetan ibilian egongo dira Euskal Herriko hainbat txokotatik egindako lana elkarbanatuz. Durangoko azokan ere presente izango dira. Araban dagoeneko hiru proiekzio daude antolatuta dagoeneko, lehenengoa Eskuernagan, berriki okupatu duten Subserra Gaztetxean, urtarrilaren 24an arratsaldeko 19:20etan. Hurrengoa Buradon-Gatzagako Gaztetxean egingo dute urtarrilaren 25ean eta, aurkezpen birari amaiera emateko, Gasteizko Oihaneder euskararen etxean proiektatuko dute dokumentala otsailaren 12an.