Urtarrilaren 24an epaituko dute Gasteizko kazetaria, Iñaki Soto Garako zuzendariarekin eta Jone Goirizelaia abokatuarekin batera. Apirilaren 9an sei urte beteko dira gomazko pilotakada batek Iñigo Cabacas hil zuenetik, baina oraindik ez da ertzainen aurkako epaiketarik egin.

Urtarrilaren 24an egingo da Iñigo Cabacasen heriotzarekin lotutako lehen epaiketa. Paradoxikoa dirudien arren, ez dute aztertuko nor izan zen hilketaren erantzulea. Aitzitik, Iñaki Iriondo kazetari Gasteiztarra -eta Hala Bediko Suelta La Olla irratsaioko kolaboratzailea-, Gara egunkaria, Iñaki Soto  zuzendaria eta Jone Goirizelaia abokatua epaituko dituzte, ‘Ugartekoren’ salaketa baten ondorioz.

Ertzainburuak egunkariaren aurka jarritako salaketan, haren «ohorea eta intimitatea» urratzea leporatzen die eta 250.000 €-ko kalte ordainak eskatzen ditu. Goirizelaia abokatuak salatu duenez, «justizia oso motel doa gauza batzuetarako eta oso azkar beste batzuetarako. Hori sentitu du Cabacasen familiak».

Hori gutxi balitz, familiaren abokatuak eta Iriondo eta Soto kazetariek berari buruz egindako adierazpenek «osasun arazoak» eragin dizkiote. Salaketaren beste puntu bat, lantokia aldatzera eta ardura postua uztera behartu zituela da.

Apirilaren 5ean sei urte beteko dira Ertzaintzaren gomazko pilotakada batek Iñigo Cabacas Athleticeko zalea Bilboko Kirruli tabernaren kanpoaldean larriki zauritu zuenetik. Apirilaren 9an hil zen, erietxean. Haren heriotzarekin lotuta sei ertzain auzipetu dituzte, baina nahiz eta ageriko frogak egon, oraindik ez dago epaiketarako datarik.