Etxebizitza eskubidearen aldeko Auzoan Bizi sareak salatu zuen egoera, eta dei egin zuen gaurko mobilizaziorako. Emakumea 2007az geroztik bizi zen etxean, baina egoera ekonomiko zailaren ondorioz, ezin izan dio hipotekari aurre egin. Goizeko lehen orduetatik, dozenaka lagun bildu dira etxebizitza inguruan, etxegabetzea eragozteko asmoz.

12:30ean zen egitekoa etxegabetzea. Ertzaintza bertaratu da, eta tentsio handiko uneak bizi izan dira kalean. Poliziak modu bortitzean kanporatu ditu hainbat lagun etxeko ataritik, eta inguruko taberna zein dendak ixteko agindua eman du operazioak iraun bitartean. Hala ere, azken unean epaileak eten du etxegabetzea, eta Polizia ez da etxe barrura sartu.

Mobilizazioetan parte hartu dutenen arabera, «etxebizitza eskubidea negozio bihurtu nahi izatea» da gatazka honen atzean dagoen arazoa. «Lan egiteak ez du babesten inor kaleratzeetatik», nabarmendu dute. Horrez gain, Laboral Kutxak etxegabetze prozesu honetan izandako jarrera gogor kritikatu dute.

Egoera honek etxebizitza eskubidearen inguruko eztabaida berriro ere mahai gainean jarri du. Abenduaren 14an Bilbon egingo den manifestazio nazionala testuinguru horretan iritsi da: Euskal Herriko etxebizitza sindikatuek dei egin dute «Etxebizitza eskubidea bermatu, negozioari ez!» lelopean mobilizatzeko.