Tubos Reunidos erosteko interesdunekin bilerak egiteko aukerak izango dituzte sindikatuek hurrengo astetik aurrera, administrari konkurtsalaren iritziz
Amurrioko lantegiko sindikatuek eta administrari konkurtsalak bilera egin dute gaur lantegian bertan, baina ez da bereziki argigarria izan. through Aiaraldea.eus | Aitor Aspuru Saez
Gaur bildu dira Amurrion Tubos Reunidos enpresako administrari konkurtsala eta sindikatuen ordezkariak konpainiaren etorkizunari buruz aritzeko, baina batzarrak ez du inkognita gehiegi argitu. Izan ere, langileei ez diete oraindik azaldu zeintzuk diren eskaintzak egin dituzten enpresak, ezta proposatu dituzten lan eta enplegu baldintzak ere.
Administrariak aurreratu du hurrengo astetik aurrera has daitezkeela bilerak interesdunekin eta orduan jarri ahal dizkiotela izenak eskaintzei, baina zenbait langile erakundek zalantzan jarri dute hori gertatuko denik, ez baitute horren beharrik salmenta prozesuak aurrera egin arte. Izan ere, azken eskaintzak abendu hasieran egingo dituzte eta orduan bai, akordioa beharko dute alde sozialarekin.
Likidazioa egikaritzeko arduradunek erantsi dute saiatzen ari direla Euskal Herrian dauden unitate produktibo guztiak aldi berean saltzen eta Trapagako lantegia soilik eskuratu nahi dutenei esan diete prozeduratik kanpo gera daitezkeela.
Edonola ere, ez dute sindikatuen galderak modu argian erantzun. Adibidez, itaun dute zer gertatuko den eskaintza ekonomiko handia egiten duenak soilik Meatzaldeko azpiegitura erosi nahi badu, eta administrazio konkurtsalak ez du jarrera irmorik erakutsi.
Urriko soldata bermatuta
Administrari konkurtsalak aipatu du ez dutela arazorik espero urriko soldata kobratzeko, baina ez daki puntual helduko diren edo egun gutxi batzuk beranduago.
Halaber, enpresako kudeatzaileek azaldu dute eskariak jasotzen ari direla, baina finantzazio arazoek oztopatzen dutela lehengaiak erostea eta ekoiztea, ez baitago likidezia nahikorik eta hornitzaileek aurretik kobratzea exijitzen dute.
SEPIren oztopoa
Tubos Reunidoseko administrariak erantsi du egoera bideratzeko traba handia izaten ari dela SEPI. Gogoratu beharra dago 100 milioi baino gehiagoko zorra duela multinazionalak erakunde horrekin eta ez duela onartu ez diru hori barkatzea ezta kapitalizatzea ere. Hortaz, salmenta baldintzatzen duen aldagai handia da SEPIrena, zer egingo duen adierazi arte behintzat.
SEPIren oztopoaren aurrean, ELA sindikatuak aldarrikatu du Espainiako Gobernuaren inplikazioa, gogoratuta erakunde publiko horrekin dagoen zorrak izugarri baldintzatzen duela operazioaren bideragarritasuna: “Zorra 300 milioi euro ingurukoa da. 170 milioi 2008an akziodunei justifikaziorik gabe banatzetik datoz, eta beste 112,8 milioi (gaur egun ia 150 milioi) 2021ean SEPIri emandako kreditu batetik datoz. Gogoratu behar da urte hauetan SEPIrekiko zorra handitu egin dela pilatu diren interes izugarrien ondorioz, mailegua sinatzean IBOR indizea baino %9,5era arteko interesak aurreikusi baitzituzten, hau da, merkatukoa baino askoz interes tasa handiagoa”.
Bide batez, langile erakundeak azpimarratu du egungo egoera zuzendaritzaren kudeaketa eskasaren emaitza dela eta Langraitzen dagoen lantegia ere konponbidearen barruan egon behar dela, 60 behargin baitaude bertan.
LABek, bere aldetik, ziurtatu du prozesuaren jarraipen estua egingo duela eta bere interes handiena dela enpresa erosleak industria proiektu sendoak hartzea bere gain. Hau da, jarduera guztia eta enplegua bermatzea. .
Horrez gain, sindikatuak Eusko Jaurlaritzari gogorarazi dio konpromisoa hartu zuela hurrengo jabeari eta inbertsoreei laguntzeko, eta gaineratu du babes hori enpleguaren bermearen eskutik heldu behar dela, langileek ez dezaten ordaindu zuzendaritzak eragindako egoera: “Laguntza horrek industria-jarduerarekiko, enpleguarekiko, lantegi guztien etorkizunarekiko eta langileekiko konpromiso argiak izan behar ditu atzean. Ezin da dirua jarri eta gero plantillari ondorioak ordaintzen utzi. Bermeak zehatzak izan behar dira, eta bete egiten direla egiaztatzeko modua egon behar da”.
ESKren oharra
ESK sindikatuak ere prentsa oharra zabaldu ELA eta LABen bide beretik. Langile antolakundeak errepikatu du jarduera industriala, Trapaga, Amurrio eta Langraitzeko azpiegituren jarraipena, enplegua eta inbertsioak bermatuko dituen eskaintzak izan behar duela lehentasun osoa.
Bestalde, salatu du enpresak jasotzen dituen eskaerak Ameriketako Estatu Batuetatik sartzen ari direla eta horrek talka egiten duela zuzendaritzaren kontakizunarekin, honek aipatu baitzuen konpainiaren arazo nagusietako bat muga-zergak zirela.
SEPIri dagokionez, sindikatuak jakin nahi du erakunde publikoak benetan baloratu duen enpresaren akzioduna izatea eta exijitu du argitzea zer egin den maileguan hartutako diruarekin eta nora joan den.
Hala Bedi babestu nahi duzu?
Hala Bedin proiektu komunikatibo libre, komunitario eta eraldatzailea eraikitzen ari gara. Egunero, ehundaka gara proiektuan parte hartzen dugun pertsonak, eragiten digun errealitatea behatuz eta hura eraldatzen saiatuz, herri mugimenduekin batera.
Gure edukiak libreak dira, inork ez digulako agintzen zer argitaratu dezakegun eta zer ez. Eta eduki hauek dohainik eta modu libre batean zabaltzen ditugu, hedapena, elkarbanatzea eta eraldaketa helburu.
Halabelarririk gabe, Hala Bedi ekonomikoki sostengatzen duten bazkiderik gabe, hau ez litzateke posible izango. Egin zaitez halabelarri eta babestu Hala Bedi!
¿Quieres apoyar a Hala Bedi?
En Hala Bedi construimos un proyecto comunicativo libre, comunitario y transformador. En el día a día, cientos de personas participamos en este proyecto, observando la realidad que nos afecta y tratando de transformarla junto a los movimientos populares.
Nuestros contenidos son libres porque nadie nos dicta qué podemos publicar y qué no. Y porque difundimos estos contenidos de forma libre y gratuita, con el objetivo de difundir, compartir y transformar.
Sin halabelarris, las socias y socios que apoyan económicamente a Hala Bedi, esto no sería posible. ¡Hazte halabelarri y apoya a Hala Bedi!
