«Poesiaren eta hitzaren mailutasuna aldarrikatzeko, estutzen gaituen munduaren aurka», literatura jaialdia antolatu du Gasteizko gaztetxeko Azpimarra irakurle taldeak, aurten bigarrenez. Hiru eguneko egitaraua prestatu dute, ekainaren 12, 13 eta 14an, ostegunetik larunbatera, literaturarekin lotutako jarduera ezberdinekin.

Ostegunean stand up ikuskizuna emango dute Asier K, Lander Varona eta Ione Bengoak. Ostiralean idazketa eta fanzine tailerrak eskainiko dituzte Azpimarrako kideek, eta iluntzean poesia mikro irekia egongo da. Ez da aldez aurretik izenik eman beharrik, bertaratu eta parte hartu ahalko da ekintza guztietan.

Larunbatean, besteak beste, mahai-ingurua emango dute Maddi Sarasua eta Xabier Montoia idazleek. Artistak garaiarekin izan behar duen harremanaz, undergroundaz eta arte popularraz, berritzeaz, euskaraz sortzeaz, artearen paperaz mugimendu politikoetan… hamaika gai izango dituzte hizpide, literaturaren eta politikaren arteko harremanaren bueltan. Ondoren, poesia errezitaldia; gauean Stit eta Gozzue taldeen kontzertuak, eta bukatzeko, Cubo-ren pintxada.

«Mimoz osatutako egitaraua guztion eskura, oinak lurrean eta begibista biharrean dituen literaturari bide egiteko», idatzi dute sare sozialetan irakurle taldeko kideek. «Pedanteria eta hitzontzikeriak utzi etxean, disfrutatu eta mundu zital hau aldatzeko gogoa, hori besterik ez duzu behar».