Auzolana  botatzea  baztertu  du  Urtaranek,  Gasteiz  Antzokia  eraikitzeko

Auzolana botatzea baztertu du Urtaranek, Gasteiz Antzokia eraikitzeko

“Gasteiz Antzokia errealitate bihurtzeko frontoia mantendu behar bada, hala izango da”, adierazi du alkateak. Oihaneder Euskararen Etxea kudeatzen duen Lazarraga elkarteak begi onez ikusi du erabakia.

Alea.eus bidez

 

Udalak Gasteiz Antzokia diseinatzeko antolatutako ideia-lehiaketako proiektu irabazlea Il Sogno del Palazzo izan da, Taller Basico de Arquitectura taldearena. Proiektuak proposatzen du Auzolana frontoia botatzea, eta lurpeko frontoi bat eraikitzea; horren gainean, antzokia eraikiko litzateke.

Dena dela, Udalak gogoratu du proiektutik zenbait gauza aprobetxatu ditzakeela, eta beste batzuk ez; eta Gorka Urtaran alkateak esan du Auzolana mantenduz Gasteiz Antzokia eraikitzeko prest dagoela. Hala jakinarazi zuen atzo udaletxean egin zen Euskararen Elkargunean. Gasteiz Antzokia eraikitzeko proiektua “guztiona” izan behar duela adierazi zuen alkateak, “eta guztion artean aztertu beharko dugu Eskoriatza Eskibele etxadiko espazioan non kokatzen dugun Gasteiz Antzokia”.

Horrez gain, Udalak proiektuaren zirriborro bat aurkeztea proposatu du Urtaranek, ondoren Elkargunean landuko dena.

Alkatearentzat proiektu hau lehentasunezkoa da, “baina euskara arloko eragile sozial eta kulturalen adostasunarekin egin behar da. Ez badago adostasunik, porrot egingo du, eta hori da, hain zuzen ere, ekidin nahi duguna”,  gaineratu du. “Gasteiz Antzokia errealitate bihurtzeko frontoia mantendu behar bada, hala izango da”.

Lazarraga elkartea, konforme

Oihaneder Euskararen Etxeak kudeatzen duen Lazarraga elkarteak begi onez ikusi du “udal gobernuak Gasteizko euskalgintzako eta Alde Zaharreko eragileen iritzia eta eskaera aintzat hartu izana”.

“Fase bat itxi da, auzolana pilotalekua alde batean utzi da”, adierazi du elkarteak, eta orain beste fase bati ekiteko unea dela gaineratu du, “guztion artean egitasmoa lantzea eta adostea”, hain zuzen ere.

Zentzu horretan, bi dira hemendik aurrera egin beharreko lanak. Batetik, etorkizuneko proiektu arkitektonikoaren oinarriak adostu behar dituzte, eta horretarako ideia lehiaketara aurkeztutako proiektuen ideiak aztertuko dituzte. Bestetik izaera juridikoa, kudeaketa eta baliabide ekonomikoak adostu behar dira. Horretarako dagoeneko lan-talde bat martxan da udaletxean. Hala, abendura bitartean lanketa egingo dute, eta 2018an proiektuaren lizitazioarekin hastea da asmoa.

“Gasteizko Kafe Antzokia Auzolana Pilotalekuan?” erreportajea

 

Arabako  kirol  jardueretako  langileen  eskaerak  bete  ezean,  greba  egingo  dute  uztailaren  23tik  31ra

Arabako kirol jardueretako langileen eskaerak bete ezean, greba egingo dute uztailaren 23tik 31ra

Greba deialdia uztailaren 23an hasi eta uztailaren 31n amaituko litzateke. Lau urte daramatzate soldaten igoerarik gabe.

Kirol jarduretako langileek bi urte inguru daramatzate hitzarmenaren birnegoziaketarekin, lan baldintza duinagoen alde borrokan. Aurrerapausuak eman ez direnez eta haien eskaerak ez direnez aintzat hartu, greba deialdia egin dute uztailaren 23tik 31ra. Uztailaren 11n ELA, LAB eta CCOO sindikatuek greba deialdia erregistratu zuten jada.

Langileek azaldu dutenez, aldarrikapenen artean daude, besteak beste, soldaten igoera. Izan ere, lau urte daramatzate soldaten igoerarik gabe, horrek dakarren eros ahalmenaren murrizketarekin. “Prekarietatea gero eta nabariagoa da eta jasanezina den puntu batetara iritsi da” argitu dute. Langile hauek, instituzio publikoek kontratatzen dituzten azpikontratetan egiten dute lan.

Langile hauen artean daude kantxetako zaintzaileak, igerilekuetako sorosleak edo kirol instalazioetan lan egiten duten beste zenbait langile. Sorosleek, adibidez, ez dituzte zaintzak kobratzen; hau da, askotan eguraldiaren menpe daude euren lana egiteko. Orain, uztailaren 23ra arteko epea zabaldu da, langileen eskaerak onartuak izan daitezen. Bestela, greba egingo dute.

Twitter kontua sortu dute: https://twitter.com/act_sos/status/884715549057400832

Auzolana  Pilotalekua,  bederatzi  urte  “frontoia  berreskuratzetik,  frontoia  defendatzera”

Auzolana Pilotalekua, bederatzi urte “frontoia berreskuratzetik, frontoia defendatzera”

Bederatzi urte bete dira Gasteizko Alde Zaharreko zenbait bizilagunek Auzolana Pilotalekua okupatu zutenetik. Inongo erabilerarik ez zuen San Jose pilotalekua okupatu zuten 2008an, eta izenari men eginez, auzolan potente baten ostean hau konpontzea lortu zuten.

Ordutik, pilota eta pala partidak, bazkari herrikoiak, ekitaldi ezberdinak… etengabeko bizitza izan du frontoiak. Bederatzi urteren ostean, ordea, arriskuan dago. Frontoia kudeatzen duen Txapa Ahotsa asanbladak adierazi duenez, orain dela bederatzi urteko “Baietz auzoak frontoia berreskuratu”  lelotik, “Baietz auzoak frontoia defendatu” lelora pasa behar izan dira.

Auzolana Pilotalekua kudeatzen duen Txapa Ahotsa Asanbladaren iritzi artikulua

“Gozatuz maite dugun hori…bederatzi urte jada” – Txapa Ahotsa Asanblada –

Bederatzi urte honezkero. Bederatzi urte Gasteizko Alde Zaharreko hainbat pertsona eta mugimenduren artean ideia bat zabaltzen hasi zela ahopeka: “Lotsagarria da nola ari diren pilotalekua usteltzen uzten… eta zer edo zer egiten badugu?”. Turistifikazioak oparitzen digun auzokideentzako espazio publikoen galeraren aurrean, auzoarekiko ardura eta maitasuna antolatzen hasi ginen. Eskolako Gurasoen Elkartea, Gaztetxea, Gao Lacho Drom ijitoen elkartea, Campillo Kirol eta Kultura Elkartea, Egin Ayllu, auzotarrak… entsalada askotariko hartatik, pilotalekuaren okupazioan amaituko zuen kanpaina jaio zen, erronka kutsuko bere lelo nagusiarekin: “Mila gorri!! Baietz auzoak frontoia berreskuratu!!” Hilabete pare batera, hainbat ekimen publikoren zein isilpeko konponketa lanen ondoren, kalejira batek San Jose pilotalekua okupatu eta Auzolana Pilotaleku birbataiatu zuen.

Estreinako erronka berreskuratzearena izan bazen, bigarrena bizi-berritzearena. Are gehiago, auzoa eginaz bizi-berritzearena. Asanblea ireki baten bidez kudeatuz; erabiltzaileak mantenuaren arduradun ere eginaz, auzoaren (eta gure aurreikuspenak gaindituz baita ere hiriaren) edozein beharri ateak zabalduz, burutu behar izan diren konponketa lan ugarientzako dirua eta jakintzak geure kabuz lortuz… Autoantolaketa, autogestioa finean. Erabileraren zenbatekoak eta bere aniztasunak gu geu harritu gintuen hasiera-hasieratik: kirolak eta jolasak, ekimen politiko zein kulturalak, langile komiteen asanbleak, herri bazkariak, GOIAN egitasmoaren eskolaz kanpoko jarduerak, pilota txapelketak.. Udalak berak ez ditu ba hainbat talde eta ekimen gurera bideratu urteotan horrela interesatu zaionean!

Eta hara non gurean, eguneroko auzogintzan ari ginela, udaletik berria heldu zitzaigun. Kafe Antzokia eraiki nahi zuen udal gobernuak Auzolana pilotalekuaren gainean. Gure hasierako galderak erantzunik gabe jarraitzen du ordudanik: Zergatik altxatu proiektu bat beste bat eraitsiz? Zergatik euskaren aldeko proiektua altxatu nagusiki euskaraz aritzen den eta euskara ere bultzatzen duen proiektu baten kaltetan? Erantzun fundamentuzkorik bat ere ez, baina inposaketak nahi beste. Azkena iragan otsailekoa. Auzoko hainbat eragilek, Antzokiaren elkarte sustatzaileak, oposizioko udal talde ezberdinek edo guk geuk prozesua gelditu eta beste modu batean ekiteko eskaerei entzungor eginaz, Kafe Antzokirako ideia lehiaketa abiatu zuen udal gobernuak. Orain dela bi aste jakinarazi zen epaia. Eta lehiaketaren oinarriek ezinbesteko egiten zuten moduan, proiektu irabazleak Auzolanaren eraisketa aurreikusten du. Ez gara horren analisian luzatuko. Proiektuaren informazio zehatzik ez dugulako, eta ez diogulako urrats honi behar baino garrantzi gehiagorik eman nahi. Izan ere, lehiaketaren oinarriek zehazten zuten proiektu irabazlea ez dela zertan izan gerora gauzatuko dena. Lehen bezala orain, hortaz, erabaki politiko hutsa izaten jarraitzen du.

Baina bada azpimarratu nahi dugun kontutxoa. Hasieratik azaldu dugu susmo bat egitasmo guzti honen inguruan: Antzokia eraikitzearen atzean auzoaren turistifikazioari bultzada berria emateko nahi ezkutua, Paseo de Ronda delakoarentzako espazioa irabaziz besteak beste (kasualitatea: turistei zabalik eta auzokideei itxia dagoen espazio… publikoa?). Bada, hara zer ohartarazpenekin hasten den epaimahaiak epaia ezagutzeko txostena: aurkeztutako proiektuei errieta egiten die, zeren eta “…han sido relativamente escasos los participantes que han sido verdaderamente conscientes del alcance y trascendencia de la ubicación sobre la que se plantea esta intervención, a pesar del esfuerzo realizado en aportar documentación relativa al valor documental e histórico de sus preexistencias y de sus potencialidades”. Zehatzago: “…la metodología de estudio de los paños exteriores del conjunto de la muralla para su puesta en valor, ha sido muy limitado en la mayor parte de los equipos”.

Ez al zen Antzokiarena euskara bultzatzeko ezinbesteko egitasmoa? Zertara datoz aurreko ohartarazpenak? Zergatik ez dago inongo aipamenik euskarari dokumentu osoan? Argi dago non dauden batzuen egiazko kezkak eta helburuak.

Tamalez, gure jaiotzako “Mila Gorri! Baietz auzoak frontoia berreskuratu!!” moldatu beharrean izan gara: “Mila gorri!! Baietz auzoak frontoia defendatu!!” Eguneroko auzogintza isilari defentsaren lerro nabarmenagoa gehitu diogu. Baina penarik ez, biak elkar-elikatzeko moduan ari gara eta. Argi dugu frontoia ez ezik auzoko eta hiriko anai-arreba okupatu eta autogestionatu guztiak behar-beharrezkoak ditugula bestelako auzo, hiri eta jendarte ereduen bilaketan. Maite dugun hori gozatzen, esperimentatzen, jolasten, borrokatzen, konpartitzen jarraituko dugu. Maite dugun hori defendatuko dugu.

2018.  urtean  erabakitzeko  eskubidea  Gasteizen  gauzatzeko,  300  bolondres  behar  ditu  Gure  Esku  Dagok

2018. urtean erabakitzeko eskubidea Gasteizen gauzatzeko, 300 bolondres behar ditu Gure Esku Dagok

Bederatzi hilabeteko konpromezua bilatzen dute. 

Jasotako sinadurak aurkezteko ekitaldia Gasteizen, maiatzean

Erabakitzeko eskubidearen alde 4.500 sinadura bildu ostean, Gasteizko Gure Esku Dagok erabakitzeko eskubidea praktikara eramateko garaia dela uste du. Horretarako, data zehatzik finkatu gabe, 2018. urtean Gasteizen herri galdeketa bat egiteko asmoa azaldu dute behin baino gehiagotan.

Hau posible egiteko, datorren ikasturterako 300 bolondres behar ditu Gure Esku Dago Gasteizek “gure hirian pauso demokratikoena emateko”. Argitu dutenez, bederatzi hiabeteko konpromezua bilatzen dute eta kontaktuan jartzeko modu ezberdinak jarri dituzte horretarako:

  • Telefono zenbakia: 672283038
  • Emaila: gasteiz@gureeskudago.eus

Bolondresak bilatzeko kartela

Uztailak  5,  80  urte  Jose  Placer  erahil  zutela

Uztailak 5, 80 urte Jose Placer erahil zutela

Ozetako Jose Placer hil zutela 80 urte beteko direla eta, udalerriko biktimak omentzeko ekitaldia egingo dute. 

Alea.eus bidez

1937ko uztailaren 5eko goizaldean, Santa Isabel hilerrian fusilatu zuten Jose Placer, EAE-ANVko militante, alderdi horretako Batzorde Nazionaleko kide, Aldundiko kudeatzaile eta Eusko Indarreko buruzagi izandakoa. Haren omenez, eta Barrundian izandako errepresaliatuak gogoan, omenaldi ekitaldia egingo dute uztailaren 8an, Ozetako udaletxe plazan.

Halako omenaldi bat egiten duten lehenengo aldia izango da Barrundian. Udala eta hainbat herritarren ekimenez egingo dute, Afro Olabe alkateak azaldu duenez. “80. urteurrena da, urte gehiegi pasa dira ezer egin gabe, eta uste genuen garaia zela; errepresio frankistaren biktimak izan direnak gogora ekarri, omenaldia egin eta, bide batez, gure historia ezagutzeko modua izango da.” 

Uztailaren 8an egingo dute ekitaldia, 13:00etan. Barrundiako errepresaliatuak gogoratuz, dantza bat eskaini eta plaka bat jarriko dute plazan. Manex Agirre bertsolaria eta Felix Placer–Joseren biloba–izango dira ekitaldian, besteak beste. “Memoria berreskuratzeko lanetan izan da Felix, eta ekitaldian ere haren hitzak entzungo ditugu”, azaldu du alkateak.

Jose Placer

1896an jaio zen Jose Placer, Ozetan, eta bertan bizi izan zen oso goiz Gasteizera joan behar izan zuen arte, lanera. 1930ean, EAE-ANV sortu zen, eta harekin bat egin zuen Arabako bultzatzaile nagusien artean. Alderdiko Batzorde Nazionaleko kide eta herrialdeko ordezkari izendatu zuten.  

1936ko altxamendu militarraren ostean, Placerrek ihes egin behar izan zuen. Lehenengo, Antzoki Berrian –egun Principal antzokia– ezkutatu zen, eta, ondoren, Ozetara alde egin zuen; handik Gipuzkoara joan zen, Elgea mendilerroa igarota, herriko gazte baten laguntzarekin –errepresaliatua izan zen gaztea honengatik–.     

Hantxe, Jaurlaritzaren agintaritzapean oste frankistei aurre egin zien armadan erroldatu zen, eta EAE-ANVkoek osaturiko Euzko Indarra batailoiko komandante zela, hainbat artilleria-unitate gidatu zituen. Gipuzkoako hiriburuan borrokatu ondoren, Jose Placer Gernikarantz abiatu zen eskualdeko artilleria-unitateen ataleko agintari. Hainbat gudarirekin batera atxilotu zuten han. 1937ko uztailaren 5ean, epaiketa sumarisimoa egin ondoren, faxistek tiroz hil zuten Santa Isabel hilerriko iparraldeko horman; Lauaxeta ere bertan fusilatu zuten.

 

Adurtzako  Jaiak  ospatuko  dituzte  uztailaren  8ra  arte

Adurtzako Jaiak ospatuko dituzte uztailaren 8ra arte

Uztailaren 8an ospatuko dute Gazte Eguna. Dj Loro, Begitruk edo Erokomeri egongo dira oholtza gainean.

Behin Zaharraz Harroko jaiak pasata, Adurtzako jaiak ospatuko dituzte aste honetan Gasteizen. Gasteizko jai zaharrenetakoak dira, izan ere, 57 urte daramatzate jai hauek ospatzen. Aurten ere, auzoko eragile ezberdinen parte hartzearekin osatu dute programazioa: pelota txapelketa edo azken 2 urteetan auzoko motozaleen taldeak antolatu duen auto zaharren erakusketa (ez da programan agertzen). Antolakuntzako kideek adierazi dutenez, “auzoko komertzio txiki eta hostalaritzaren laguntza ezinbestekoa zaigu”.

Kontzertuei dagokienez, ostiralean eta larunbatean izango dira txosnaguneko kontzertuak: Begitruk, Dj Loro, EXK edo Erokomeri erromeriak kontzertua eskainiko dute. Aipatzekoa da ere jaien bitartean bi herri bazkari eta bi herri afari egongo direla, tartean, larunbateko gazte bazkaria eta ostiraleko presoen etxeratzearen aldeko herri afaria.

Uztailaren 3an hasi zen Gazte Astea eta aste guztain zehar, txosnagunea prestatu ahala, ekimen ezberdinak egongo dira Adurtzako auzoan,  kontzertu batekin eta bi mahaingururekin osatuz aste hau..

Gazte Eguna

Ohikoa den moduan, larunbatean Gazte Mugimenduak hartuko du protagonismoa. VI. Gazte Egunerako egun osoko egitaraua antolatu dute Olarizuko Gazte Asanbladak eta Ernai Gazte Antolakundeak. Herri bazkariaren aurretik, goizean, “Adurtza Xtrem”-en parte hartzeko deia luzatu diete Gazte Asanbladako kideek Gasteizko auzo eta kuadrila ezberdinei.

Kartel guztiak

 

Desobeditzen  jarraitzeko  deia  egin  dute  Mozal  Legearen  bigarren  urteurrenean

Desobeditzen jarraitzeko deia egin dute Mozal Legearen bigarren urteurrenean

Larunbatean, uztailaren 1ean, Mozal Legea indarrean sartu zenetik bi urte bete ziren. Gasteizen Eleak/Libre mugimenduak deitutako manifestazioa burutu zuen herri mugimenduak, ‘Mozal Legeari ez! Herriak desobedientzia!’ lelopean, aurreko asteetan zehar egindako desobedientzia dinamika ixteko, baina desobedientzia praktikara eramaten jarraitzeko deia eginez.

Okupazioa  “tresna  erabilgarria  dela”  aldarrikatu  dute  gazteen  blokeen  okupazioaren  aurkako  epaiketan

Okupazioa “tresna erabilgarria dela” aldarrikatu dute gazteen blokeen okupazioaren aurkako epaiketan

Uztailaren 3ko bista bertan behera geratu da, Udaltzaingoa ez delako epaiketara aurkeztu. “Harro eta tinko” lanean jarraituko dutela aldarrikatu dute babesa adierazteko elkarretaratzean. 

GESek deitutako elkarretaratzearen pankarta, epaitegien kanpoaldean

Udaberrian Alde Zaharreko blokeak okupatu zituzten gazteen aurkako epaiketaren bigarren bista ez zen burutu uztailaren 3an. Ekainaren 29an, Kutxi 92ko bi gazte epaitu zituzten; uztailaren 3an, berriz, Pinto 20ko hiru gazte, baina Udaltzaingoa ez da epaiketara aurkeztu. Urriaren 16ra atzeratu du epaileak bista hau. Elkarretaratzea egin du Gazte Emantzipaziorako sareak (GES) epaitegien aurrean.

Elkarretaratzean azaldu dutenez, etxebizitza horiek gazteei zuzendutako etxebizitzak ziren, baina sei urtez hutsik egon zirenez eta “jendeak ez dituenez zuen zurikeriak sinisten”, hauek okupatzeari ekin zioten: “Badakigu etxeak ez direla zerutik eroriko”.

Epaiaren xedea, GESen esanetan, “mugimendua kriminalizatzea eta beldurra sartzea besterik ez da”. “Alternatibak eta aukera ezberdinak erabiltzen dituzte gazteen kontrako beste muntai bat eramateko aurrera, inguruan duten guztia merkantilizatu nahi ez duten gazteak baitira”. Utzita dauden etxe horiei bizi berri bat eman nahi izan diete gazteek, “lapurtutako hori herriari berriz ere bueltatzeko”. Izan ere, erabilera soziala izan behar zuten okupatutako bloke hauek.

Amaitzeko, “espekulazioaren eta burokrazia zikinaren aurrean gure baliabide preziatuena” erabiltzen jarraituko dutela aldarrikatu dute: okupazioa. Ezaguna den leloak esaten duen moduan, gazteek argi utzi dute “huste bat ematen badute, okupazio berri bat” eramango dutela aurrera. “Harro eta tinko” jarraituko du GESek lanean.

Ekainaren  28an  LGTBIQ+  harrotasuna  Gasteizko  kaleetan

Ekainaren 28an LGTBIQ+ harrotasuna Gasteizko kaleetan

Ekainaren 28an, LGTBIQ+ Harrotasun Egunaren harira, egun osoan zehar Gasteizko kaleak kolorez bete ziren askapen sexualaren eta desobedientziaren alde, ‘Heteropatriarkatua desobeditu, plazerez blaitu. Es un placer desobedecer’ lelopean. Mugimendu feministak deituta, eguerdian bazkaria eta arratsaldean murala egin zituzten Hala Bedi Tabernan. Honen ostean, kalejira abiatu zen Andra Mari Zuriaren plazara, eguneko manifestazio nagusira.

Desobedientzia  dinamika  abiatu  dute  Mozal  Legearen  bigarren  urteurrenaren  atarian

Desobedientzia dinamika abiatu dute Mozal Legearen bigarren urteurrenaren atarian

Uztailaren 1ean bi urte beteko dira Hiritar Segurtasunerako Legea edo ‘Mozal Legea’ indarrean sartu zenetik. Egun horretan, manifestazioa deitu du Eleak Mugimenduak Gasteizen, ‘Mozal Legeari ez. Herriak desobedientzia!’ lelopean eta herri mugimendu ezberdinekin elkarlanean. Gainera, desobedientzia dinamika abiatu dute guzti honen harira, mobilizazioaren aurreko asteetan zehar ekimen gehiago iragarriz.

Dinamika honen lehenengo geltokia ekainaren 14ko goizean izan zen Eusko Legebiltzarrean. Bertan, ekintzaile talde batek mobilizaziora deitzeko pankarta bat kokatu zuen Legebiltzarreko hesian. Horrekin batera, Mozal Legearen artikulu ezberdinekin egindako paperezko hegazkinak bota zituzten barrura, instituzio honen ardura salatzeko. Izan ere, 2015 eta 2016 urteetan zehar, «Mozal Legea 8.087 aldiz aplikatu dute EAEn», ekintzaileek azaldu dutenez. Horretaz gain, 2016ko ekainaren 22an, legebiltzarraren ordezkaritza politikoaren gehiengoak Mozal Legea ez aplikatzeko konpromisoa hartu zuen arren, ordutik 2016. urte amaiera arte «2.857 aldiz» aplikatu zutela ohartarazi dute.

Uztailaren 1eko bezperetan, desobedientzia dinamikarekin jarraituz, Gasteizko Alde Zaharreko Kutxi kaleko lokal huts baten fatxadan mural bat egin dute, larunbatean 18.30ean Gasteizko Bilbo plazatik irtengo den manifestaziora deitzeko.


BIDEOAK

Mozal Legearen aurkako ekintza Eusko Legebiltzarrean:


Mozal Legearen kontrako manifestaziora deitzeko murala Alde Zaharrean:

12 orrietatik 1 orria12345...Azkena »

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies