Xabier Gojenola (Errigora): “Kezka eta irrika ezberdinak dituztenen arteko batura da Errigora”

Xabier Gojenola (Errigora): “Kezka eta irrika ezberdinak dituztenen arteko batura da Errigora”

Zubigintza lelopeko kanpaina abiatu du Errigora ekimenak: Nafarroa hegoaldeko produktuak euskaraz etiketatu eta zabaltzen dituzte Euskal Herri osoan, etekinak Erriberako euskalgintzari bideratzeko eta bertako ekoizpena bultzatzeko, aldi berean. Xabier Gojenola Errigorako kidearekin hitz egin dugu gaur Araba Hizpiden, eta Errigorak interes ezberdinak batu egin dituela nabarmendu du, zubi lana eginez. Udazkeneko kanpainari ekingo diote aurki.

Entzun
Ivan Santamaria (kazetaria): “Hiriko kasuan, nola ulertzen da 18 milioi euro jasotzea diru-laguntzetan eta akusatuek dirurik ez galtzea?”

Ivan Santamaria (kazetaria): “Hiriko kasuan, nola ulertzen da 18 milioi euro jasotzea diru-laguntzetan eta akusatuek dirurik ez galtzea?”

Iban Santamaria kazetaria

Iban Santamaria kazetaria

Ivan Santamaria Berriako kazetaria egon da gaur Araba Hizpiden, Hiriko kasuari argia eman nahian: punta-puntako teknologia zuen auto bat sortzeko 19 milioi euroko diru-laguntza eman zen, baina proiektuak porrot egin zuen. Epaiketa egiten ari da orain merkataritza-arloko epaitegian, eta akusatuak Gasteizko enpresari ezagunak dira; areago, horietako batzuk EAJren ingurukoak dira. Aldi berean, zigor-epaitegia ere ari da instrukzioa egiten.

Entzun
Gasteizen bizi den kataluniar bat eta Katalunian bizi den gasteiztar bat, aurrez aurre

Gasteizen bizi den kataluniar bat eta Katalunian bizi den gasteiztar bat, aurrez aurre

Jordi Serra Gasteizen bizi da, baina Gironan jaio zen. Iñigo Rodredo Bartzelonan bizi da, baina Gasteizen jaio zen. Gasteizen bizi den kataluniar bat eta Katalunian bizi den gasteiztar bat aurrez aurre jarri ditugu Araba Hizpiden, gaur bertan aldarrika litekeen independentziaz hitz egiten. Bakoitzari, dagoen tokitik eta duen jatorritik abiatuta, Kataluniako egoerak sorrarazten dizkien sentipen eta hausnarketak ezagutu nahi izan ditugu solasaldi atseginean.

Entzun
Europari begira | Hibai Arbide kazetaria, Atenasetik

Europari begira | Hibai Arbide kazetaria, Atenasetik

Europari begira jartzen gara astean behin Araba Hizpiden. Gaurkoan, Hibai Arbide TeleSurreko kazetaria izan dugu, Atenasetik zuzenean. Alemanian joan den irailaren 24an eginiko hauteskundeen jarraipena egin zuen Arbidek, eta horri buruz hitz egin digu: Merkelen garaipena, ultraliberal arrazisten igoera…

Horrez gain, Grezian gaur bertan onartuko den genero-identitateko legea izan du hizpide Arbidek: bere hitzetan, oso lege progresista da, erabat kontserbadorea den gizarte baterako.

Entzun
“Zuriegia, agian” -Josean Bueno-

“Zuriegia, agian” -Josean Bueno-

Urriaren 10a gaur, egun historikoa izan daitekeena, Kataluniako independentzia aldarrikatu daiteke hango Parlamentuan. Gertaerak eta erabakiak pilatuko dira, eta ondorioak historia orrialdeetara pasako dira, modu batean edo bestean. Horretaz berba egin behar, nola ez.

Kataluniako egoerari buruz analisi ugari, batzuk oso zorrotzak, daude eskuragai han eta hemen. Nik ez dut saltsa handietan sartuko, are gutxiago esateko batzuek eta besteek zer egin beharko luketen adierazteko. Begirada ez dut jarriko independentzia edota burujabetasunaren aldeko manifestazio erraldoietan, ezta Bartzelonan berriki egin zen Espainiaren aldeko beste manifestazioan. Larunbateko manifestazioak hartuko ditut hizpide, hau da, elkarrizketaren aldeko manifestazioak, Espainiar Estatuko hiriburu batzuetan burutu zirenak.

Harrigarri samarra iruditu zitzaidan, besteak beste, zuria hartu zutelako sinbolo gisa: jantzi zuriekin, kartel zuriekin, pankarta zuriekin atera ziren, han eta hemen, kalera. Helburua, elkarrizketa eta negoziazioa eskatzea, etor litezkeen gatazkak eta kalteak ekiditeko. Asmoa ona, dudarik gabe, eta seguru nago borondate oneko pertsonak bildu zirela halakoetan.

Baina badira, deialdi horretan, zalantza sortzen duten kontu batzuk. Izan ere, deitzaileen atala zuriz zegoen, dirudienez modu “espontaneoan” sortutako deialdiak dira. Zer nahi duzu esatea, niri nork deitzen duen jakitea gustatzen zait, batez ere deialdia hobeto ulertzeko bere testuinguruan, egon litezkeen asmoak hobeto antzemateko, deitzaileen fidagarritasuna neurtzeko … Nork proposatzen duen jakitea deialdi baten oinarrizko kontua iruditzen zait. Eta sinadurarik gabeko hori ez dut gogoko, mesfidantza sortzen dit, agian dagoeneko gaztetxoa ez bainaiz auskalo norekin bidea partekatzeko, norekin noan jakiteari funtsezkoa deritzot.

Gainera, deialdian alde bietara deia egiten zaie bitartekaritza eta elkarrizketa bidea har dezaten alde biak maila berean jarrita. Horrela, zurian. Baina zuri horrek gainontzeko koloreak eta errealitateak estaltzeko erabil daiteke, behe-lainoa trinkotzen denean bezala. Zuria baino ez da ikusten eta errealitatearen mugak eta formak desegiten dira. Izan ere, elkarrizketa eta bitartekaritzaren aurrean oso jarrera desberdinak izan dira konflikto honen aldeetan, kolore eta forma desberdinak. Ezin da dena estali oihal zuri batez eta guztiei hitz egin berdinak balira bezala, izan ere, ez dira berdinak. Ezta elkarrizketari dagokionean ere, batzuek, dagoeneko, bitartekaritza onartu eta eskatu dute, besteek, ez.

Zuria ere bada mezua, ez da sartzen analisietan. Ez du esaten, adibidez, Kataluniako herritarrek eskubidea duten ala ez bere etorkizuna erabakitzeko. Eta hori da konfliktoaren muina. Arazo hori ukitu gabe manifestazioen mezua zuria da, edukirik gabekoa, borondate on zein baliogabeko baten erakusketa. Ulertzen dut Espainia aldean katalanek Kataluniari buruz erabakitzeko eskubidea izan behar dutela adieraztea ez dela erraza izango. Katalanentzat beraientzat ez da erraza suertatzen ari eskubide horren defentsa. Baina arazo hori isiltzeak, zuriz uzteak, edukiz husten du honelako deialdi bat. Auzi honetan sartu gabe, zikindu gabe, lan gutxi egin daiteke konponbidean. Eskubide batzuen alde ala kontra egin behar da, horretan aratz, garbi eta zuri ezin da egon, beste mundu ideal batetik gauzak begiratuz.

Elkarrizketa egun hauetan aldarrikatzen dutenen artean asko isil-isilik egon dira orain arte, eta egoeraren larriaz ohartuta orain hitz egiten dute etengabe elkarrizketa akordio eta erreferendum itunduaren beharraz. Baina urteak eta hilabeteak egon dira aurretik hori guztia eskatzeko eta bideratzeko. Ez da egin, haiek jakingo dute zergatik. Kataluniako kaleak urteetan bete dira mobilizazio desberdinez, burujabetasunaren aldarria ardatz. Folklorea zela uste zuten? Buruzagi politiko batzuk egoki presionatuta dela bertan behera geratuko zela uste zuten? Katalunian bizi den edonork bazekien burujabetasunaren eskaera gero eta zabalagoa zela gizartean. Paper zuri batean jaso dute hori guztia orain arte, eta orain besteek ere dena ezabatzeko eta zuri-zurian berriro hastea nahi dute?

Kolore zuriak, bestalde, esanahi berezi batzuk ere ekartzen ditu gogora. Zuria da ateratzen den bandera etsaiari adierazteko etsi egin dugula, amore eman dugula, ez dugula borrokatzen jarraituko. Edozein trapu zuri ateratzen zuten airera beren burua galdutzat ematen zuten soldadu horiek. Hemen, nori eskatzen ari zaio zuriz janzteko, amore emateko, gauzak bere hartan uzteko? Ez dirudi hori eskatzen zaionik Espainiako Estatuari, daukan jarrera eta daukan boterea ezagututa. Estatu horri aurre egitera ausartu diren arma gabeko milaka horiei ari zaie eskatzen, edo, hobe esanda, Generalitateko Gobernuari, bere eskuetan baitago mugimendu politiko horri erantzuna eta jarraibidea ematea. Kolore zuria, honegatik ere, ez da aukerarik onena; are gehiago, momentu hauetan, gauzak dauden lekuan, bandera zuria ezinezkoa dela esango nuke: milaka eta milaka herritarrek erakutsi dute kemen harrigarri eta baketsua eskubideen defentsan.

Gauzak aldatu nahi dituenak behar ditu elkarrizketak negoziazioak, akordioak. Gauzak dauden bezala mantendu nahi dituenak soberan ditu elkarrizketa guztiak, ez bada funtsik gabeko irudia emateko. Horregatik, ene irudiz, txeke zuria ezin zaio orain eman Rajoyren gobernuari arazoa estali eta usteltzen utz dezan. Dena atzeratu, paper zuria mahai gainean jarri agian egon litekeen balizko negoziazio baten truke? (hain zuzen ere orain arte ukatu egin den hori). Zurikeria dirudi.

Euskaraz “zuritu” esaten dugunean zerbait itsusia onargarria bihurtu nahi dela adierazten dugu. Hainbeste kartel zuri, arropa zuri, pankarta zuriren atzean zer zuritzen den galdetzen diot nire buruari. 

JOSEAN BUENO SAEZ DE ALBENIZ

Entzun
Zuiako Udalak ‘Pauldarren’ proiektuan bere hitza betetzea eskatu dio Hezkuntza sailari

Zuiako Udalak ‘Pauldarren’ proiektuan bere hitza betetzea eskatu dio Hezkuntza sailari

 

Agustin Otxoa Zuiako zinegotziarekin hitz egin dugu, “Pauldarren” eraikinean egitekoa den ikastetxe-konplexuari buruz. Hezkuntza Sailak derrigorrezko hezkuntzako atal guztiak Zuiako “Pauldarren” eraikinean egiteko proiektua abiatu zuen eta, horretarako, Zuiako Udalak inguruko lurrak erosi bazituen ere, Hezkuntza Sailak ez du bere hitza bete. Momentuz, ez ditu abiatu proiektua gauzatzeko lanak. Udaletik, Hezkuntza Sailarekin harremanetan jartzeko hainbat saiakera egin dituzten arren, ez dute eurekin hitz egitea lortu.

Entzun
Analisia | “Espainiako erregeak gauza txarrak etor litezkeela adierazi zuen bere diskurtsoan” -Txema Rz. de la Piscina-

Analisia | “Espainiako erregeak gauza txarrak etor litezkeela adierazi zuen bere diskurtsoan” -Txema Rz. de la Piscina-

Etengabe aldatzen ari dira Kataluniako kontuak: aste honetan bertan, 24 orduko epean, Espainiako eta Kataluniako agintari gorenen diskurtsoak entzun ditugu, baita Soraya Saenz de Santamariak Puigdemonti emandako erantzuna ere. Horrez gain, New York Times egunkari estatubatuarraren editorial batean Rajoy Espainiako presidenteari “intrasigent bully” (zapaltzaile intrantsigentea) deitu izanari garrantzia eman dio Ramirez de la Piscinak. 

Entzun
“Harriduraz bezala” -Alaitz Andreu Eizagirre-

“Harriduraz bezala” -Alaitz Andreu Eizagirre-

Altsasuko gazteek 326 egun egingo dituzte kartzelan gaur, eta jakin ezazu zenbagarrena beteko duten estatu espainiarrean eta frantziarrean sakabanatuta dauden gainerako 309 euskal preso politikoek. Arnaldo Otegi eta Rafa Diez duela oso gutxitik esna daitezke beren etxeko ohean. Ez dakit zenbat auto-istripu eduki dituzten dagoeneko presoen senideek eta lagunek aurten.

Duela gutxi arte, Auzitegi Nazionalaren hobby gustukoenen artean zegoen manifestazioak debekatzea. Zenbat pilotakada igaro ote zaizkigun orkatiletik bost zentimetrora, eta zenbatek zulatu diguten bizkarra. Burua izan ez bada. Cabacas.

Noelia Noemi ile-apaintzaileari zintzurra moztu zion senarrak pasa den astean, Sestaon. Herenegun, aizkorakada batek hil zuen Ana Belen hezitzaile gasteiztarra. Senarrak hil zuen. Larunbatean, txerrikeria bat esan-jaurti-bota zion tipo ezezagun batek lagun emakume bati taberna batean, ahoa bete-bete. Bakean uzteko esan, eta bera jotzera etorri zen, oldarkor. Geratu egin genuen. Estatu espainiarrean, 80 erailketa matxista izan dira jada 2017an.

Transbollomarika Sareak Gasteizen gertatutako lau eraso lesbofobo edo transfoboren berri eduki zuen udan. Armairuek kaleak betetzen dizkigute, ikusten ez ditugun arren.

Komentario arrazisten eta xenofoboen ondorioz, Twitterreko txoriak botaka egin zuen atzo. Alemanian, bi ordu eta erditik behin egoten da eraso xenofobo bat. Los Pichis ijito-familiak sekulakoak jasan zituen Abetxukun, duela urtebete eskas.

2017an, oraingoz, 20 langile hil dituzte lan-baldintza eskasek Hego Euskal Herrian. Soldata are eskasagoen ondoriozko pobreziak zenbat berogailu itzaliko ote dituen aurtengo neguan.

Pentsa ezazu zenbat indarkeria, gehiegikeria, diskriminazio eta zapalketa bizi izan ditugun azken hamazazpi urteotan; seguru aipatu ez ditudan pila bat bururatuko zaizkizula. Milaka.

Igandean, erreferenduma egin zuten Katalunian. Estatu espainiarrak poliziez, pilotakadez, zartakoz eta bandera espainiarrez bete zituen hango kale eta eskola ugari. Bideo beldurgarri asko ikusi ditugu. Izugarria izan zen.

Gertakari horien harira, frankismoari, XXI. mendeari eta 2017. urteari egindako aipamen pila entzun ditut, bai sare sozialetan, bai hedabideetan, bai jendearen ahotan. Frankismoaren garaitik hona bizi izan ditugun gertakari larrienak izan direla diote batzuek, Euskal Herrian gertatutakoak lurpean gordeta-ahaztuta egongo balira bezala. 309 preso politiko horiek beren etxean lokartuko balira bezala.

XXI. mendean Kataluniakoak gerta eta onar ezin daitezkeela diote, XXI. mendea garai txit agurgarri prestu baketsua balitz bezala. Harrituta hitz egiten dute, gainera. 2017an gaudela! Azalduko al dit norbaitek zer duten XXI. mendeak eta 2017ak magikotik? Bataren ordez bia jartzeak bidegabekeriak amaiarazi zituen akaso? Nik ezetz uste dut.

Denbora antolatzeko tresna dira mendeak, eta, batez ere, historiaz hitz egiteko balio dute. 100 urte igarotakoan, mendea amaitzen da, eta beste bat hasten. Ez da besterik gertatzen. Ez, gizartea ez da egun batetik bestera aldatzen. Espainiar estatua ez zen 1999ko gabonzaharretan aldatu, eta boteredunek ez zioten beren armak erabiltzeari utzi. Heteropatriarkatu kapitalistak bere horretan jarraitzen du. Berdin-berdin.

XXI. medea, berez, ez da ezer. Ez pentsa aurreko mendeetakoak baino hobeak garenik. Gainera, gertakarien ondoriozko harridura-aurpegiz oihukatzen dugunean XXI. mendean gaudela, nongo XXI. mendeaz ari gara?

Alaitz Andreu Eizagirre

Entzun
Victor Cruz (GED-Gasteiz): “2018ko herri-galdeketari begira, 300 gasteiztar behar ditugu lan ezberdinetarako”

Victor Cruz (GED-Gasteiz): “2018ko herri-galdeketari begira, 300 gasteiztar behar ditugu lan ezberdinetarako”

Gasteizko Gure Esku Dago plataformako Victor Cruzekin hitz egin dugu, abian dituzten proiektuen inguruan. Kataluniako herriarekiko elkartasun-mobilizazioez gain, 2018an herri-galdeketa egiteko asmoa dute, eta 300 gasteiztar behar dituzte lan ezberdinetarako. Cruzek adierazi digunez, lan ezberdinak izango dira, eta bakoitzak erabaki dezate zein zereginetan egongo den gusturago. Datorren asteartean, urriak 9, asanblea deitu dute Aldabe gizarte etxean, arratsaldeko 19:00etan.

Entzun
Tertulia: Zurine Rodriguez eta Xabier Izaga kazetariak

Tertulia: Zurine Rodriguez eta Xabier Izaga kazetariak

Ostegunero bezala, tertuliaren tartea zabaldu dugu ARABA HIZPIDEn. Gaur kazetarien txanda izan da: Zurine Rodriguezek eta Xabier Izagak aktualitateko azken berriak aletu dituzte, azken hilketa matxistatik abiatuta, Kataluniako egoeraraino, Alfredo Remirezek jasotako zigorra eta adinekoekiko mespretxua tarteko.

Entzun

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies