Solasaldia: Haizea Marijuan EH Bilduko batzarkidea

Solasaldia: Haizea Marijuan EH Bilduko batzarkidea

Tertuliaren tartean, Haizea Marijuan EH Bilduko batzarkidea egon da gaur ARABA HIZPIDEn, bakarka, aktualitateko gaiak jorratzen. Arabako pentsionisten mobilizazio masiboak, martxoaren 8ko greba feminista, martxoaren 3ko deialdiak eta “Errementari” filmaren estreinaldia izan ditu hizpide Marijuanek.

Entzun
“Plazara!” -Bego Ozaeta-

“Plazara!” -Bego Ozaeta-

Martxoa heldu da ya , udaberria dator, eguraldi ona, argia, oporrak eta halako historioak. Baina ez pentsa “tierna” jarri naizela. Martxoa  gasteiztarrentzat hilabete garrrantzitsua da baita ere. Hor daukagu Martxoak 3, eta Martxoak 8, eta aurten PDSk antolatutako manifestazio berri bat

Martxoak 3 hor bueltan dago, asteburu honetan ya. Lan munduan eta jendartean daukagun egoera ikusita, aurten Martxoak 3ko ekitaldia elkarte sozialak eta sindikatuak antolatu dute. Eta izan zinetelako gu gara eta garelako besteak izango direlako, aurten emakumeak izango dira protagonistak. 18:30etan omenaldia eta 19:00etan urteroko manifestazioa. Aurreko pankartan emakumeak soilik “Guztion Indarrak batuz Aldaketa Gauzatu” leloarekin.

Gaurko egoera soziala eta orain dela 42 urteko egoera antzekoak dira, baina gauzatxo bat bai aldatu da. Emakumeak bezain txarto gaude, baina mugitzen gera. Martxoak 8an sistemari planto egingo diogu. Zaintza greba, kontsumo greba, ikasketen greba, lan uzteak… Greba feminista izango da. Emakumeok mundua geldituko dugu egun hartan. Egun osoa kalean gure lan baldintzak eta gure prekaritatea salatzen, oraindik emakumeak zaintzaileak garela salatzen, eta badakizu ze gehiago. Etorkizuna hobea izango dela itxaropenez. Gizonak zelan lagundu? Erraza! Egun hartan ez izan protagonista, lagundu, zaindu seme alabak, edo gurasoak, ikastolara eraman, bazkaria prestatu… alboan egon, baina ez lehen lerroan, hori emakumeentzako da. Manifestazioak goizeko 12:00etan eta arratsaldeko 20:00etan. Gizonak badakizue, atzean

Eta arnasa hartu ta gero ba dator hirugarren mobida hilabete honetan, martxoak 21an. Arabako foru Aldundiaren Politika antisocialak alda ditzaten. Aniztasun funtzionala diputazioak nola egiten duen aurre, autonomía pertsonala bultzaten ez dituzten politikak eta gaizki deritzogun “menpekotasuna” ri  aurre egiteko eta vuelta bat emateko deituta gaude danok  arratsaldeko 19:00etan martxoaren 21an.

 Badakizu,  gasteiztar eta ez gasteiztar,  plazara!

Bego Ozaeta

Entzun
LAB: “Herri mugimenduan lanean ari diren kolektiboen ekarpena ikusarazi nahi dugu martxoaren 3an, emakumeena, bereziki”

LAB: “Herri mugimenduan lanean ari diren kolektiboen ekarpena ikusarazi nahi dugu martxoaren 3an, emakumeena, bereziki”

Herri mugimenduko kolektiboen esku utzi du euskal gehiengo sindikalak martxoaren 3ko manifestazioa. 1976ko martxoaren 3an hildako bost langileak eta 150 zaurituak oroitzeko ekitaldi nagusian, kolektibo ezberdinetako emakumeek eramango dute pankarta, euren aldarrikapenei lehentasuna emanez, martxoaren 8ko greba feministaren atarian. Miriam Diaz de Tuesta LABeko kidearekin hitz egin du ARABA HIZPIDEk, erabaki horren nondik norakoak ezagutzeko. Guztiok indarrak batuz, aldaketa gauzatu! lelopeko manifestazioa arratsaldeko 19:00etan irtengo da Zaramagako martxoaren 3ko plazatik, eta Andre Maria Zuriaren plazan amaituko da, Mugimendu Feministaren hitzartzearekin. Orain dela 42 urte bezain beharrezkotzat jo du Diaz de Tuestak langileen eskubideen defentsan mobilizatzea.

Informazio gehiago, hemen.

Entzun
“Nazionalismoa vs. patriotismoa: hitzei nork ezartzen die balioa?” -Patxi Goenaga-

“Nazionalismoa vs. patriotismoa: hitzei nork ezartzen die balioa?” -Patxi Goenaga-

Hitzak asko maite ditut. Aitortzen dut. Hizkuntzak ere maite ditut benetan. Hizkuntzak oro, eta euskara bereziki. Horregatik, maiz entzungo didazue hizkuntzaz hizketan eta hitzen erabileraz gogoeta egiten. Gaurkoan ere hala ariko naiz. Baina ez hitz biluzien gainean, baizik hitzen artean hautua egiterakoan hautatzaile garen gizakiok erakusten dugun jarreraz, konturatuta edo konturatu gabe.

Azken hilabeteotan komunikabideek gure belarriak eta burmuina asetzeraino darabilten gaia da Kataluniako afera (ez dakit nola deitu, egia esan). Txarrena da ez zaiola ikusten amaierarik kontu horri, inoiz amaiera izango badu. ETAren amaiera, aldiz, laster ikus genezake. Ongi etorria izan bedi. Nik behintzat hala uste dut. Gure amama zenari, txikia nintzela,  bere errelatoa egiterakoan, orain esaten den bezala, askotan entzuten genion harako hura: ‘bakerik txarrena gerrarik onena baino hobea duk’. Arrazoi zuelakoan nago. Espero dut, nahi nuke, desadostasunak desadostasun, bakea egingo dela eta gizarte askeago batean bizitzeko aukera izango dugula.

Batzuek, hala ere, gerra terminologia gogoan eta ahotan, derrota hitza maite dute. Arerioa disolbatuta ez ezik, garaitua, azpiratua nahi dute, derrotatua. Ez al da nahikoa derrota, zorrak ordaindu eta taldea desegitea bera? Bada, ez dirudi. Hor etorri zaigu Frantzia gozo ederretik, Manuel Valls jauna, bere herriko hauteskundeetan politikoki aski garaitua berau, sari bat jasotzera Donostiara. Gregorio Ordoñez Fundaziokoek emandako saria jasotzera, hain zuzen. Sari honekin “Nazionalismoen kontra eta patriotismoaren alde” egindako defentsa batetik, eta klase politikoari “Europaren ikuspegi historikoago bat izatea exijitu izana” bestetik eskertu nahi izan omen dute Frantziako lehen ministro ohia. Horra bi hitz magiko: nazionalismoak pluralean eta patriotismoa singularrean. Nazionalismoak gaiztoak dira, nonbait, kaltegarriak eta arriskutsuak. Historian zehar gertatu diren eta gertatzen diren kalapita izugarrien sorrarazleak dira,  batzuen ustez. Hala mintzatu izan dira zenbait kultur-gizon eta idazle ospetsu ere egunkarietan, behin eta berriro ‘ez-legezkoa’ zela gogorarazten diguten Kataluniako erreferendumaren bezperetan. Nazionalismoak milioika hildako eragin zituela XX. mendean. Hala gogorarazi zigun Albert Boadella antzerkigileak. Eta komunikabideak txaloka… Baina zer da hau?

Zer du nazionalismoak hain fama txarra izateko? Nazionalismo guztiak molde berekoak al dira? Patriotismoa eta nazionalismoa desberdinak bide dira. Hala uste izango dute batzuek, zinismo pixka batekin bada ere. Hala izango da. Baina patriotismo guztiak ere ez dira mota bereko, ez eta nazionalismo deitzen direnak ere. Esaiozue basamortuan kanpamentuetan, beren lurretatik egotziak bizi direnei ez izateko nazionalista, izateko patriotak. Zein patriako? Zein aberritako? Ala Marokok sahararrei buruz izandako jokamoldea patriotismo jarrera bat al da? Eta, aldiz, Polisarioaren jokoa, esaterako, nazionalismo ankerra? Eta Espaniar estatuak  garai batean bere probintzia afrikar haietako hura Marokoren esku uztea patriotismo kontua izan ote zen? Gustura galdetuko nieke.

Alegia, hitzei errespetua galdu diegu eta nork bere interesen arabera manipulatzen ditu.  Patriota horiek baldin badiote –batzuek dioten bezala- Kataluniako (eta EH-ko) eskoletan nazio amankomunarekiko gorrotoa inokulatzen ari direla eta Hezkuntza sistema berzentralizatu egin behar dela ikasleei benetako historia (errelatoa) kontatu ahal izateko, zertaz ari gara? Nire adineko jendeari “Formación del Espíritu Nacional” erakutsi ziguten. “Espíritu nacional”. Espiritu santua bazela ezin sinistarazi eta espiritu nacional erakutsi behar guri. Batzuentzat beren naziotasuna aldarrikatzea bidezko da eta horri  patriotismoa deitzen diote eta patriotismo hori ona da, legitimoa. Baina estatu handi horren barruan norbaitek bestelako proiektu bat amesten badu bere burua beste komunitate bateko kide ere ikusten duelako, alegia, abertzalea bada, orduan abertzaletasun hori arriskutsua da, kaltegarria, nazionalismo bilakatu baita. Juxtu alderantziz.

Eman diezaiegun hitzei dagokien balioa eta ez ditzagun gauzak manipulatu eta geure interesen arabera erabili.

Gogoeta honi amaiera emateko, gogoratu nahi nituzke sari emate honen testuinguruan bertan entzun ahal izan ziren beste zenbait esaldi kezkagarri ere. Omenduak Frantzia eta Espainiaren arteko lankidetza premia aldarrikatu zuen. Lankidetza honek azkeneraino iritsi behar omen du, banda terrorista azpiratu arte, erabateko derrota arte. Sarituak aldarrikatu zuen, gainera, ETAren amaiera ez dela izan behar poliziala eta judiziala bakarrik. Derrota politikoa eta kulturala ere izan behar omen du. Zer izan daiteke talde terrorista baten derrota kulturala? Benetan kezkaturik gelditu nintzen. Pentsatu nahi dut erretorikaren olatuak, berboaren uholdeak, eramango zuela gure lehen ministro ohia baieztapen hori egitera. Bestela, ez dakit zer esan nahi duen, derrota politiko eta polizialaz haratago derrota kultural horrek.

Patxi Goenaga

Entzun
“Martxoaren 8ko greba feministaz harago, egunero egiten ditugun kontsumo-moten kontzientzia hartu behar dugu”

“Martxoaren 8ko greba feministaz harago, egunero egiten ditugun kontsumo-moten kontzientzia hartu behar dugu”

Martxoaren 8a iritsi bitartean, greba feministaren ardatzen inguruko solasaldiak egiten ari dira HIZPIDEA magazinean. Gaurkoan, kontsumoaren txanda izan da. Horretarako, Ainhoa Bilbao Arkotxa Setemeko kidea eta Itxaso Compañon Lantziegoko ardogilea izan dira saioan, greba feministaren testuinguruan gure kontsumo-moldeen inguruan hitz egiteko. Bilbao Arkotxak Setemek egindako ikerketa bat izan du hizpide, kontsumoa eta indarkeria matxista lotzen dituena. Compañonek, bestalde, nekazaritza ekologikoa zabaltzeak gizarte osoarengan izango lituzkeen onurez hitz egin digu. Ondorioa argia izan da: gure kontsumo-moldeak berrikusi behar ditugu, emakumeei ez ezik, gizarte osoari ekarriko baitizkio onurak.

Entzun
Mugikortasun gutxiko pertsonen taxi-zerbitzuko laguntzak murriztu dituztela salatu du Eginaren Eginez elkarteak

Mugikortasun gutxiko pertsonen taxi-zerbitzuko laguntzak murriztu dituztela salatu du Eginaren Eginez elkarteak

Igor Nabarrorekin hitz egin du ARABA HIZPIDEk, Eginaren Eginez elkarteak mugikortasun gutxiko pertsonen taxi-zerbitzuko laguntzak murriztu dituztela salatu duela-eta. Orain arte, zerbitzua Gasteizko Udalaren eta Arabako Foru Aldundiaren artean kudeatzen zen, baina zerbitzuaren kudeaketa osoa hartu du bere gain Aldundiak. Horren ondorioz, orain arte taxia erabili izan duten zenbait pertsona zerbitzurik gabe geratu direla salatu du elkarteak, euren egoera aldatu ez den arren. Horren arrazoietako bat da erabiltzaileen egoera ekonomikoa hartuko dela kontuan hemendik aurrera, eta elkarteak erabat bidegabekotzat hartu du neurria. Aldundiak ez du kontuan hartu, gainera, mugikortasun gutxikoen kolektiboen iritzia, Nabarroren esanetan.

Entzun
“Erregea biluzik dago!” -Iñaki Lazkano-

“Erregea biluzik dago!” -Iñaki Lazkano-

 

Errege biluzik dago,

Inork ez dio ezer esan

Errege biluzik dago….

Joxe Ripiau

Oso ezaguna da behinola urruneko herrialde batean enperadore bati bere jantzi berriarekin gertatutakoa, Hans Christian Andersen daniar idazleak ezin hobe kontatu zigun bere ipuin ederrean: nola biluzik zihoan agintari txit gorenari, itxurakeriaren itxurakeriaz, existitzen ez zen jantzia ikustarazten zioten; eta areago, berak ere sinestarazten bere menpekoei jantzita zihoala. Ume lotsagabe eta egiazale mukizu batek bueltatu zituen guztiak errealitatera. “Erregea biluzik dago!”-oihukatu zuen ozenki.

Eta denek onartu behar izan zuten begibistakoa. Ez jantzi, ez dotoreziarik.

Espainian ere txakurrak hanka hutsik, eta erregearen inguruko inor ez da ausartzen larrugorritan dabilela esatera. Gutxieneko jantzi demokratikoak erabat urratuta dituela adieraztera. Oinarrizko askatasunak guztiz murriztuta daudela oihukatzera.

Erregea biluzik dago, eta korteko bufoiak kartzelaratu egin dituztenez, ez dago egia lau haizetara barreiatuko duen ahotsik, rap-lariak eta tweet-lariak giltzapetuta baitaude; are gehiago, artea bera ere paretetatik erauzi baitute.

Erregea biluzik dago, eta inguruan gurtzaile profesionalak baino ez zaizkio geratzen.

Izan ere, erregeak berak ere badaki biluzik doala, ez baitu zerekin jantzi, aspaldi ahituak baitira oihal duinak bere erresuman.

Erregea biluzik dago, eta ondoko errepublikara joan behar izan du herri txiki baina duin bateko biztanleek bere biluztasuna mundu osoko “mobile phone” berrienekin erretratatu dezaten.

Erregea biluzik dago,

Espainia larrugorritan.

Iñaki Lazkano

Entzun
“Eskolak gizartearen ispilua izan beharko luke, eta segregazioak ez dio mesederik egiten inklusioari”

“Eskolak gizartearen ispilua izan beharko luke, eta segregazioak ez dio mesederik egiten inklusioari”

Gasteizko Euskal Eskola Publikoaren aldeko plataformak prentsa-agerraldia egin zuen atzo eta datu kezkagarriak kaleratu zituen: haur eta lehen hezkuntzan, haur etorkinen % 92 eskola publikoan dago matrikulatuta, eta % 8 baino ez dago itunpeko ikastetxeetan. Hori ez da, noski, gizartearen isla erreala, Maider Ruiz de Egino plataformako kidearen esanetan. Orain dela bi urte egin zuten salaketa bera, eta egoera egonkortu egin dela adierazi dute plataformatik, eta betikotzeko arriskua duela ere bai. Eusko Jaurlaritzari eskatu diote berehalako neurriak har ditzan, hala nola matrikulaziorako leihatila bakarra edo elitizazioa bultzatzen duten hezkuntza-erakundeetara diru publikorik ez bideratzea. Datu guztiak daude eskuragarri plataformaren webgunean. Aurrera begira eman beharreko pausuez hitz egiteko asanblea irekia deitu dute datorren martxoaren 1erako, arratsaldeko 19:00etan, Landatxo gizarte etxean.

Entzun
“Eraldaketa, sortzaileON afera” abiatu dute, emakumeak, sormena eta euskara ardatz hartuta

“Eraldaketa, sortzaileON afera” abiatu dute, emakumeak, sormena eta euskara ardatz hartuta

“Eraldaketa, sortzaileON afera” egitasmoa ezagutu dugu, Irantzu Lekue artista garaikidearen eskutik. Lekuek berak sustatu du proiektua, Olatz Alonso kazetariarekin eta Maider Oleaga zinegilearekin batera. Emakumeen sormen-prozesua ezagutzeko proiektua izango da, eta zenbait hitzaldiren bitartez gauzatuko da. Josune Arakistain musikaria, Garazi Lopez de Armentia koreografoa, Izar Mendiguren bertsolaria, Izaskun Urkijo arte-zuzendaria eta Irati Jimenez idazlea izango dira, besteak  beste, hitzaldi bana ematen, Arabako hainbat herritan. Emakumeen autonomia eta ahalduntzea sustatu nahi da proiektuaren bitartez, eta hitzaldiak bideo-arte egitasmo batean bilduko dituzte.

Entzun
Laguntza Pertsonalerako Prestazio eskasak erabiltzaileak erakunde pribatuetara bideratzen dituela salatu du PDSk

Laguntza Pertsonalerako Prestazio eskasak erabiltzaileak erakunde pribatuetara bideratzen dituela salatu du PDSk

Laguntza Pertsonalerako Prestazio Ekonomikoaren bitartez horren beharrean diren pertsonek jasotzen dituzten diru-laguntzak oso murritzak dira. Hori dela-eta, pertsona horiek Zerbitzuari Lotutako Prestazio Ekonomikoak eskatzera bultzatzen ditu Foru Aldundiak eta, ondorioz, diruz ordain ezin daitezkeen zerbitzuak erakunde pribatuen bitartez estaltzen direla salatu dute Javier Saenz eta Iban Albizu Eskubide Sozialen Aldeko Plataformako kideek. Horrek zerbitzu publikoen pribatizazioa eragiten du, Plataformako kideen esanetan. Egoera hori salatzeko, eta Foru Aldundiak kalitatezko gizarte-politika publikoak gauzatu eta hauen beharra duten pertsonen autonomia susta dezan eskatzeko, manifestazioa deitu du Plataformak martxoaren 21erako.

Entzun

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies