Miren Larrion: “Tranbiako lanak esleituta daudenez, aprobetxa ditzagun hilabete hauek galdeketa lehenbailehen egiteko”

Miren Larrion: “Tranbiako lanak esleituta daudenez, aprobetxa ditzagun hilabete hauek galdeketa lehenbailehen egiteko”

Miren Larrion EH Bilduren gasteizko Udaleko bozeramailea izan da gaur Araba Hizpiden, udal kontuez hitz egiteko. Elkarrizketa luzea izan da, mamitsua: EAJ-PSE udal gobernuaren aurrekontu-proposamenetatik hasi eta egoera politiko orokorrerainoko errepasoa egin du Larrionek, Santo Domingoko desalojoak, tranbiaren polemika eta Errekaleor bezalako gaiak alboratu gabe. Tranbiari dagokionez, helegitea aurkeztu baino, Urtaranek galdeketa azkartu beharko lukeela adierazi du. Kataluniako auziaz eta EAJren jarrerez ere hitz egin du EH BIlduren bozeramaileak.

Entzun
Hegoaldeko Tranbiari Ez plataforma: “Harridura sortzen digu Udalak eta EAJk herri-galdeketarekiko duten jarrerak”

Hegoaldeko Tranbiari Ez plataforma: “Harridura sortzen digu Udalak eta EAJk herri-galdeketarekiko duten jarrerak”

Hegoaldeko Tranbiari Ez plataformak 5.500 sinadura bildu ditu Gasteizko tranbiaren hegoalderako zabalpena geldiarazteko. Rafa Puelles plataformako kidearen iritziz, proiektua ez da beharrezkoa, oraingo ibilbideak estaltzen baititu Adurtza eta San Kristobaleko biztanleen beharrak. Beste auzo jendetsuago batzuek premia handiagoa dute, euren ustez. Gorka Urtaran alkateak herri-galdeketa egiteko erabakiari helegitea ipintzeko asmoa harriduraz hartu dute plataformako kideek, eta ezkutukerian aritzea leporatzen diote Udalari.

Entzun
Zabalik da Errigoraren saskiak eskatzeko epea, Nafarroa hegoaldeko produktuak eta euskara bultzatzeko, aldi berean

Zabalik da Errigoraren saskiak eskatzeko epea, Nafarroa hegoaldeko produktuak eta euskara bultzatzeko, aldi berean

Erriberako ekoizleen produktuak euskaraz etiketatuta zabaltzen ditu Errigora ekimenak. Modu horretan, helburu bikoitza lortzen dute: hurbileko produktuak ingurune hurbilean zabaltzea, Euskal Herri hegoaldeko produktuak lurralde osora hedatuz, eta Erriberako euskalgintzari laguntza ekonomikoa ematea, etekinen zati bat euskararen zabalpenera bideratzen baitute.

Gastezien ere zabalik da Errigoraren saskiak eskatzeko epea: azaroaren 14ra bitartean egin ahal izango da eskaera Gasteizko AEKren euskaltegietan eta sindikatu eta eskoletan. Ekimenaren webgunean bertan ere egin daitezke eskariak: www.errigora.eus. Bi saski izango dira: zuria eta beltza. Horietako bakoitzak produktu sorta ezberdina izango du. Jasotzeko, aldiz, Txagorritxuko Etxegorri auzo elkartearen egoitzan jarri dute hitzordua, abenduaren 2an, larunbata.

Entzun
“Errementari” -Irantzu Lekue-

“Errementari” -Irantzu Lekue-


Asteburu honetan aurkeztu da “Errementari” filma Euskal Herrian. Zehazki, Donostiako Fantasiazko eta  Beldurrezko zinemaren baitan aurkeztu du Paul Urkijok bere azken lana: bere lehen luzemetraia. Victoria Eugenia antzokian izan zen, jaialdi honek eskaintzen duen atmosfera bereziaren baitan.

Euskal Herriko ipuin bat hartzen du oinarri Urkijok bere istorioa garatzeko eta, pelikula hasi aurretik publikoari eskatu zion moduan, “filma umeak izango bagina bezala ikustea” da kontuan. Urtean, arduretan atzera egin eta “tabula rasa” horretan, istorioa dastatzea.

Errementari Araban kokatzen da eta hizkuntza aldetik egileek -Koldo Zuazo eta Gorka Lazkanok- XIX. mendean desagertutako euskara arabatarra landu nahi izan dute. Txalotzeko kontua Paul Urkijok komunikabideetan azaldu bezala asko zirelako gazteleraz grabatu ezkero parte hartu zezaketen aktore ospetsuak. Baina Urkijok, eta Errementari filmeko taldeak apustua interesgarriago baten alde egin zuten. Chapeau!

Filmaren nondik norakoa hau da: 10 urte pasatu dira 1833ko lehenengo Gerra Karlistatik. Arabako herrixka batean, Alfredo izeneko Diputazioko komisario bat gertakari bat ikertzen ari da, eta arrastoek basoaren sakonean dagoen errementeria beldurgarri batera daramate. Bertan, errementari arriskutsu eta bakarti bat bizi da: Patxi. Inguruko herritarrek hari buruzko istorio ilunak kontatzen dituzte, lapurreta, hilketa eta demonioekin egindako tratuei buruzkoak. Egun batean, Usue izeneko neskatxa batek errementeria misteriotsuan sartzea lortzen du, eta agerian uzten du Patxi Errementariak ezkutatzen duen egia izugarria.

Ez dizuet gehiago aurreratuko gaurkoz. Hori bai, barre algarak, munstroak, drama eta mitologia uztartzen dituen film bikain honekin gozatzeko gonbitea luzatu nahi dizuet.

Gozatu detailetxoekin, gozatu Izaskunek arte zuzendaritzatik eginiko lan izugarriarekin, Errementaria ikusgarria da detaile eta atmosferan, gozatu paisaiekin, Kandido Uranga protagonistak eginten duen lan bikainarekin, Uma Bracaglia edo “Usue” umetxoaren lanarekin, emozionatu zaitezte bizitzea tokatzen zaizkion kontuekin. Eneko Sagardoi, Ramon Agirre edo Ortzi Acostaren lana ere nabarmentzekoa da baina zabaldu begiak filmak lortu dituen munstro eta deabruekin.

Agian infernua maite dugulako baina… Errementari berriz ikusteko gogoekin nago. Eta hori ez zait sarritan gertatzen.

Zorionak talde osoari. Sekulako lana egin duzuela agerian geratu da, bai horixe!

Entzun
Zurine Rodriguez (Emakumeen Asanblada): “Pertsonen beharrak eta nahiak erdigunean ipiniko dituen urbanismoa behar dugu”

Zurine Rodriguez (Emakumeen Asanblada): “Pertsonen beharrak eta nahiak erdigunean ipiniko dituen urbanismoa behar dugu”

“Hiri zaintzaile baterantz. Zaintzak birpentsatzen feminismotik” lelopean, hitzaldia antolatu du Arabako Emakumeen Asanbladak urriaren 27an, Montehermoso Kulturunean. Produktibitatea eta ekonomia ardatz duen hiritik, pertsonen nahiak eta beharrak erdigunean ipiniko duen hirigintzaz jardungo dira, Blanca Valdivia Gutierrez Punt 6 kolektiboko kidearekin. Hurrengo egunean, saio praktikoa antolatu dute: bezperan jasotako Gasteizen aplikatzeko moduak aztertu, eta irizpide batzuk ezarriko dituzte, Gasteiz hiri zaintzailea izan dadin, feminismoaren ikuspegitik pentsatuta.

Entzun
Udal ordezkarien tertulia: aurrekontu proiektua eta tranbiaren galdeketa

Udal ordezkarien tertulia: aurrekontu proiektua eta tranbiaren galdeketa

Gorka Iturriaga EAJ ko ordezkaria eta EH Bilduko Aitor Miguel udal gaiei buruz aritu dira gaur ARABA HIZPIDEn. EAJ eta PSE udal gobernuak aurkeztutako aurrekontu proiektua eta tranbia hegoalderantz zabaltzeari buruzko herri-galdeketa izan dituzte hizpide, eta egrian geratu dira bien arteko ezadostasunak.

Entzun
“Armiarmaren pozoia” -Blanca Urgell-

“Armiarmaren pozoia” -Blanca Urgell-

Azkenotan ez dut egunkaria irakurtzen, tabernaren batean goizeko kafesnea hartzeko sartu ezean. Ez dut teleberririk ikusten inongo katetan. Ez dut irratia pizten, etengabeko musika botatzen dutenetako bat izan ezik. Funtsean, ez dut egunerokotasun mediatikoan murgiltzeko ahaleginik egiten. Are gehiago, esan liteke kontrakoa egiten dudala: nahita horretatik ihesi nabil.

Gauza handiez, eta nahi baino txiki gehiagoz ere maiz, twitter bidez enteratzen naizela aitortu behar, dena dela. Eta horrek are eta sendoago bihurtzen du nire ihesa, ez-arian hartu dudan erabakirik gabeko erabakia.

Zeren eta nik diru publikoa lapurtu dutenak pikotan jarriko nituzke, Matxete plazaren erdian, kapirotea buruan, saiek erraiak jan diezazkieten. Edo, pikotan baino hobeto beloritean, 1596ko Refranes y Sentencias-ek dakarren hitz politaz baliatuz. Bertako errefrau batek dioenez, Belorita, ezkur ona eskeki asko baleuko, hau da, “Pikota, fruta-arbola ona (litzateke), zintzilikario asko baleuzka”. Eskeki pilatxo bat izango lituzke nire beloritak, arraioa.

Jendearen protestak ito dituztenak, edo oraindik ere horretan dabiltzanak, aldiz, Sisiforen lanak egiten ipiniko nituzke, harria maldan gora bultza-bultzaka igotzen, gailurrera gerturatu bezain laster behin eta berriz maldan behera abia dakien.

Hedabideetan egunero gezurretan dabiltzan ahobero, ziniko eta maltzurrei, oihuka komunikatzen direnei edota gorrotoari axaxa ematen diotenei, ostera, mihia ebakiaraziko nieke, edo motozerraz, edo kurrikaz: oraindik ez dut erabaki.

40.000 mila pertsona itsasoan galtzen utzi dituztenak. Jendea kalean lotan ikusi eta etxea hutsik daukatenak. 6.000 euroko poltsak erosten dituztenak, edo ahal izanez gero erosiko lituzketenak. Enpresa itxi, langileak bota eta urrezko jubilazioa dutenak.

Urratu, apurtu, hautsi, mailatu, jo, suntsitu, bertan behera bota nahi nituzke. Jipoitu, astindu, egurtu, hebaindu, makilatu. Iletik tiratu, aurpegia atzamarkatu, zarratatu, zafratu, zehatu.

Batzuetan etxeko atean bizi den armiarma amaraunetik zintzilik ikusi dut, geldirik, niri so. Eta ni berari so gelditu naiz, hipnotizaturik. Auzokoak uste du kosk egin didala. Zuek ere pentsatzen duzue armiarmaren pozoiak burutik egin nauela?

Entzun
Esti Besa (ardogilea): “Rioja ardoaren sormarkak ez gaituela ordezkatzen sentitzen dugu”

Esti Besa (ardogilea): “Rioja ardoaren sormarkak ez gaituela ordezkatzen sentitzen dugu”

Arabako Errioxako ardoen jatorrizko izendapena sortzea aspaldiko eskakizuna da Errioxako ardogileen artean. Orain dela bi urte, eskakizun hori indartu egin zen, Artadi upategi handiak Rioja sormarka utzi eta hainbat ardogile txikik eskakizuna kaleratu zutenean. Orain, zonifikazioa aplikatzea erabaki dute: Rioja sormarkaren barruan jarriatuko dute, baina upategi bakoitzak bere herriaren edo mahastiaren izena jartzeko aukera izango du. Behin-behineko erabakia da, asanblean onartutakoa. Esti Besa ardogileak, baina argi du berezko izendapena beharrezkoa dela Arabako ardoei ikusgarritasuna emate aldera.

Entzun
Zapateneo: “Eztabaida bultzatu nahi duen proiektu kontrakulturala gara”

Zapateneo: “Eztabaida bultzatu nahi duen proiektu kontrakulturala gara”

 

 

Zapateneok 15 urte bete berri ditu, eta egitarau oparoa osatu dute urteurrena ospatzeko. Liburudenda alternatibo, liburutegi asoziatibo, argitaletxe, banatzaile eta eztabaidagune izan nahi duen espazioaren iraganaz, orainaz eta etorkizuneko asmoez hitz egin digute Mikel Lacalle eta Luis Carmona Zapateneoko kideek. Zapa kaleko 93. zenbakian izango dira ekitaldi guztiak, eta egitarau osoa lotura honetan dago ikusgai: EGITARAUA

Entzun
“Kultura zergekin ordainduta dago” -Jaione Agirre-

“Kultura zergekin ordainduta dago” -Jaione Agirre-

 

Oraintsu artikulu interesgarri bat irakurri dut EHUk ateratzen duen Campusa aldizkarian (2017ko urriaren 13koa), ikuspuntu adierazgarria daukana: Kultura guztion zergekin ordaintzen dela eta, horrexegatik, kontuan izan behar dela norentzat egin behar den eta norengana iristen den kultura hori.

Artikulua EHUko bi ikerlari eta irakasleei egindako elkarrizketa da, argitaratu duten lan baten harira egindakoa. Ikerlariak Victoria Ateca eta Beatriz Plaza dira, Ekonomia eta Empresa Fakultatekoak.

Elkarrizketaren izenburuan oso ondo laburtzen da niri interesgarria egin zitzaidan ideia (gehiago jorratzen dituzte, digitalizazioaren eragina, adibidez): kultura eta antolatzen diren kultur ekintzak denok ordaintzen ditugunez (gure zergen bidez), denontzat antolatuta eta denonagana iristeko modukoak izan behar dira, zeren bestela, elite txiki batengana iristen den jarduera multzoa izango da, nahiz denok ordaindu, eta hori ez da justua ez eta ekonomikoa.

Jarduera kulturaletara hurbiltzen den pertsona kopurua antzekoa da Europa osoan eta kanpoan geratzen da talde handi bat: ez bakarrik eskualde edo sarrera maila baztertuetako jendea, baizik eta hezkuntza maila desberdintasunak ere nabari direla esaten digute.

Kultur jarduerak, batez ere, hiritarrak direla gaur egun ere esaten dute, eta haietan parte hartzeko interesa ere bai. Eskaintzak, prezioak eta denbora mugak ere eragiten omen du eta hori konpontzeko modu bakarra hezkuntza da.

Beraz, inklusiboa izan behar du kulturak eta gizartearen eremu guztietara iritsi behar da, zeren bestela, elkarrizketatuek dioten moduan “aberatsenen kontsumo kulturala denon zergekin finantzatzen da”.

Entzun

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies